हिंगोली : हवामान विभागाकडून वर्तविण्यात आलेल्या अंदाजानुसार राज्यातील काही भागात आज जोरदार पावसाने हजेरी लावली आहे. आज दुपारच्या सुमारास हिंगोलीत जोरदार पावसाला सुरुवात झाली असून तासाभरापासून मुसळधार पाऊस कोसळत आहे. या पावसामुळे संत नामदेव पोलीस कवायत मैदानावरील पावसाचे पाणी हिंगोली शहर पोलीस स्टेशनच्या परिसरात साचल्याने पूर परिस्थिती सारखे चित्र निर्माण झाले होते. 

राज्यात परतीच्या पावसाचे आगमन झाले आहे. या आठवड्यात राज्यातील अनेक भागात जोरदार पावसाने हजेरी लावली आहे. वादळी वाऱ्यासह जोरदार पाऊस होत असल्याने मोठे नुकसान होत आहे. दरम्यान दोन दिवसांपूर्वी हिंगोली जिल्ह्यात जोरदार पावसाचा तडाखा बसला होता. यानंतर आज पुन्हा एकदा जोरदार पावसाने हाहाकार माजविला आहे. यामुळे हिंगोली शहरातील काही भागात पाणी साचले होते. 

वादळी वाऱ्याचा तडाखा 

पावसासोबत जोरदार वादळी वाऱ्याचा देखील तडाखा बसला आहे. यामुळे हिंगोली बस स्थानकाच्या परिसरात अशोक चव्हाण व मेघना बोर्डीकर यांच्या स्वागताचे पोस्टर्स वादळी वाऱ्याने कोसळल्याची घटना घडली आहे. दरम्यान यामध्ये कुणालाही इजा झाली नाही. मात्र वाहतुकीची कोंडी निर्माण झाली होती. तर शहरातील रस्त्यांवर देखील पावसामुळे मोठ्या प्रमाणात पाणी साचल्याचे पाहण्यास मिळत आहे. 

सांगलीसह जिल्ह्यात इतर भागात पाऊस
सांगली : सांगली शहरासह जिल्ह्यातील काही भागात दोन दिवसांपासून उसंत घेतलेल्या पावसाने जोरदार हजेरी लावली. सकाळपासून कडक उन्हामुळे अंगाची लाहीलाही होत असताना दुपारच्या सुमारास अचानक ढग दाटून आले. दुपारच्या सुमारास सुरू झालेल्या अवकाळी पावसाने सांगली शहरासह जिल्ह्यातील जतसह काही भागात पावसाने हजेरी लावली. शहरातील सकल भागात जोरदार पावसामुळे पाणी साचले होते.