वाशिममध्ये समृद्धी महामार्गावर भीषण अपघाताची घटना घडली. भरधाव कार उलटून झालेल्या अपघातामध्ये चौघांचा जागीच मृत्यू झाला तर एक जण गंभीर जखमी झाले आहेत. जखमीला उपचारासाठी रुग्णालयात दाखल करण्यात आले आहे. जखमीची प्रकृती चिंताजनक आहे. वाशिम पोलिस या अपघाताचा तपास सुरू आहे.

मिळालेल्या माहितीनुसार, समृद्धी महामार्गावर वाशिमच्या वनोजा- कारंजादरम्यान चॅनल क्रमांक 215 वर कारला भीषण अपघात झाला. ही कार पुण्यावरून नागपूरच्या उमरेडला जात होती. कारमधील सर्वजण एकाच कुटुंबातील होते. उमरेडला राहणारे जयस्वाल कुटुंबीय नामकरण सोहळ्यासाठी पुण्याला गेले होते. पुण्यावरून परत येत असातना त्यांच्यावर काळाने घाला घातला. नागपूर कॉरिडॉरवर वाहन चालकाचे कारवरील नियंत्रण सुटल्याने कारला अपघात झाला. भरधाव कार डिव्हायडरला धडकून महामार्गावर उलटली.

या अपघातात कारमधील दोन जणांचा जागीच मृत्यू झाला. तीन जण गंभीर जखमी झाले होते. जखमींना रुग्णालयात उपचारासाठी दाखल करण्यात आले पण आणखी दोघांचा उपचारादरम्यान मृत्यू झाला. मृतांमध्ये वैदीही जयस्वाल, संगीता जयस्वाल, राधेश्याम जयस्वाल आणि माधुरी जयस्वाल यांचा मृत्यू झाला. तर चेतन जयस्वाल गंभीर जखमी झाले आहेत. वाशिम येथील रुग्णालयात त्यांच्यावर उपचार सुरू आहेत.