मुंबई : राज्यभरातील विविध जिल्ह्यात पहिल्याच पावसाने कहर केला आहे. पहिल्या पावसाने शेतकऱ्यांचे मोठे नुकसान केले आहे. पहिल्या पावसाने शेतकऱ्यांच्या बागा उद्ध्वस्त केल्या आहेत. तर अनेकांच्या घरांमध्ये पाणी शिरलंय. या पावसामुळे लातूरमध्ये एक रस्ताही वाहून गेला आहे. पहिल्याच पावसाने पिकांचे मोठे नुकान झाल्याने शेतकरीराजा हवालदिल झाला आहे.

पहिल्या पावसाचा कहर सोलापूर, लातूर , अहमदनगर, बुलढाणा, जालना, छत्रपती संभाजीनगर या जिल्ह्यात पाहायला मिळाला. मुसळधार पावसाचा बागायतदार शेतकऱ्यांनाही मोठा फटका बसला आहे. सोलापूर जिल्ह्यात झालेल्या मुसळधार पावसामुळे मोहोळ तालुक्यातील टरबूज, डाळिंब आणि केळी बागांचं नुकसान झालंय.

अहमदनगरमध्येही संततधार पाऊस

अहमदनगरमध्येही संततधार पाऊस सुरु आहे. नगरमध्ये सकाळपासूनच पाऊस सुरु आहे. संततधार पावसामुळे जनजीवन विस्कळीत झालं आहे. संततधार पावसामुळे रस्त्यावर पाणी साचले आहे. या पहिल्या पावसाने शाळकरी मुलांचेही हाल झाले.

पर्यायी रस्ताच गेला वाहून

लातूर-उदगीर महामार्गावरील नळेगाव येथील पुलाशेजारील पर्यायी रस्ता वाहून गेला आहे. यामुळे लातूर-उदगीर वाहतूक पूर्णपणे बंद झाली आहे. तर पहिल्याच पावसात जिल्ह्यातील अनेक भागात जनजीवन विस्कळीत झालं आहे.

खामगावात ढगफुटीसदृश्य पाऊस

बुलढाणा जिल्ह्यातील खामगाव शहरात मध्यरात्री ढगफुटी सदृश्य पाऊस झाला. या मुसळधार पावसामुळे रस्त्यावर पाणीच पाणी झालं. या पावसामुळे अनेकांच्या घरात पाणी शिरलं. तसेच दुकानातही पाणी शिरलं. खामगावात बोर्डी नदीलाही पूर आला होता. त्यामुळे परिसरात पाणीच पाणी दिसून आलं. अचानक आलेल्या ढगफुटीसदृश्य पावसाने खामगावात शहरात प्रचंड नुकसान झालं आहे.

शेतकऱ्यांची शासनाकडे मोठी मागणी

नांदेड जिल्ह्यात मे महिन्याच्या पहिल्या आणि दुसऱ्या आठवड्यात अवकाळी पावसाने झोडपलं. या पावसाने जिल्ह्यातील फळबागांचे मोठं नुकसान झालं आहे. 23 शेतकऱ्यांचे 745 हेक्टरवरील बागांचे नुकसान झालं आहे. या नुकसानीची भरपाई शासनाने द्यावी, अशी शेतकऱ्यांची मागणी आहे. २ कोटी ३९ लाख ९ हजार ४०० रुपये निधीची मागणी शेतकऱ्यांनी शासनाकडे केली आहे.