Rain Hits Latur: पावसाचा धुमाकूळ, लातूरचे जनजीवन विस्कळीत;शिरूर अनंतपाळ- उदगीर, लातूर- उदगीर मार्गावरील वाहतुक ठप्प

- संदीप भाेसले

लातूरमध्ये पावसाची जाेरदार बॅटींग झाल्याने लातूर - उदगीर महामार्गावरील नळेगाव येथील पुलाशेजारील पर्यायी रस्ता वाहून गेला. परिणामी उदगीर लातूर महामार्गावरील वाहतुक पूर्णपणे बंद झाली आहे.

लातूरमध्ये पहिल्याच पावसात जिल्ह्यातील अनेक भागात जनजीवन विस्कळीत झाले आहे. लातूर-उदगीर महामार्गावरच्या नळेगाव येथील नविन पुलाशेजारील पर्यायी रस्ता पहिल्याच पावसात वाहून गेला आहे. त्यामुळे लातूर उदगीर वाहतूक पूर्णपणे बंद झाल्याने नागरिकांची फार माेठी अडचण झाली आहे.

लातूर बार्शी महामार्गावरच भरला आठवडी बाजार

लातूर जिल्ह्यातल्या मुरुड गावात आज आठवडी बाजार आहे. मात्र आठवडी बाजाराच्या मोकळ्या जागेत पावसाचे पाणी साचल्याने आठवडी बाजार लातूर बार्शी महामार्गावरच भरवला आहे. त्यामुळे महामार्गावर प्रचंड मोठ्या वाहनांच्या रांगा लागल्या आहेत. यामध्ये विद्यार्थ्यांच्या स्कूल बस देखील अडकून पडल्या. त्यामुळे नाहक विद्यार्थ्यांना आणि प्रवाशांना या वाहतूक कोंडीचा मोठा त्रास होतो आहे.

Edited By : Siddharth Latkar