Nagpur heatwave yellow alert latest news : राज्यात काही ठिकाणी मान्सूनपूर्व पावसाने हजेरी लावली आहे, पण विदर्भात सू्र्य मात्र अद्याप कोपलेलाच आहे. अनेक जिल्ह्यातील तापमान ४० च्या पार गेले आहे. हवामान विभागाकडून विदर्भातसाठी उष्णतेच्या लाटेचा यलो अलर्ट जारी केला आहे. सकाळी ११ ते दुपारी ४.३० पर्यंत सार्वजनिक कार्यक्रमावर बंदी घालण्यात आली आहे. नागपूर आणि वर्धा या दोन जिल्ह्यात उष्णतेच्या लाटेचा इशारा देण्यात आला आहे.

तर आज (ता. १५) मराठवाड्यातील छत्रपती छत्रपती संभाजीनगर, जालना, परभणी, हिंगोली आणि विदर्भातील अकोला, अमरावती, वर्धा जिल्ह्यांत उष्ण लाटेची शक्यता आहे. तर कोकणातील पालघर, ठाणे, मुंबई, रायगड जिल्ह्यांत उष्ण व दमट हवामानाचा अंदाज आहे. दक्षिण मध्य महाराष्ट्र, मराठवाड्यात वादळी पावसाचा अंदाज असल्याने सतर्कतेचा इशारा (येलो अलर्ट) हवामान विभागाने दिला आहे.

विदर्भात उन्हाचा पारा चांगलाच चढला असून, हवामान विभागाने नागपूर आणि वर्धा जिल्ह्यात १६ ते १८ मे या कालावधीत उष्णतेच्या तीव्र लाटेचा (Heat Wave) 'यलो अलर्ट' जाहीर केला आहे. या पार्श्वभूमीवर, नागरिकांच्या सुरक्षेसाठी नागपूर विभागीय आयुक्त विजयालक्ष्मी बिदरी यांनी सूचना जारी केल्या आहेत. वाढत्या उष्म्यामुळे होणारी जीवितहानी टाळण्यासाठी सकाळी ११ ते दुपारी ४:३० या वेळेत कोणत्याही सार्वजनिक कार्यक्रमांच्या आयोजनास सक्त मनाई करण्यात आली आहे.

विभागीय आयुक्तांनी विद्यार्थी, शेतमजूर आणि कामगारांच्या आरोग्याच्या दृष्टीने तातडीने उपाययोजना करण्याचे आदेश दिले आहेत. उन्हाच्या तीव्रतेत काम करणाऱ्या नागरिकांना दिलासा मिळावा आणि उष्माघाताचा धोका टळू शकेल, यासाठी स्थानिक प्रशासनाला सतर्क राहण्याच्या सूचना देण्यात आल्या आहेत. वाढत्या उष्णतेमुळे नागरिकांनी दुपारी घराबाहेर पडणे टाळावे आणि पुरेशी काळजी घ्यावी, असे आवाहनही प्रशासनाकडून करण्यात आले आहे.

मे आणि जून या २ महिन्यात विदर्भात उष्णतेचा अलर्ट लागू राहणार आहे. नागपूर व चंद्रपूर महानगरपालिका क्षेत्रात यासंदर्भात उपाय योजना लागू करण्यात आल्या आहेत. नागपूर जिल्ह्यामध्ये उष्णतेच्या लाटेसंदर्भात उपाययोजना लागू करण्यात आल्या आहेत. या उपाययोजना 16 जून पर्यंत लागू राहतील, असे जिल्हाधिकारी कुमार आशीर्वाद यांनी बैठकीत सांगितले.

मॉन्सून शनिवारी अंदमानात दाखल होणार -

नैॡत्य मोसमी वाऱ्यांच्या (मॉन्सून) अंदमानातील आगमनासाठी पोषक स्थिती तयार झाली. दक्षिण बंगालचा उपसागर, अंदमान समुद्रात ढगांची रेलचेल वाढली आहे. शनिवारपर्यंत (ता. १६) अंदमान - निकोबार बेटांवर मॉन्सून दाखल होण्याचा अंदाज हवामान विभागाने वर्तविला आहे.