सरकारच्या शिष्टमंडळानं जरांगे पाटलांना भेटण्यास नकार दिल्यानंतर आता ठाकरेसेनेनं सत्ताधाऱ्यांवर गंभीर आरोप केलेत.सरकारला जरांगे पाटलांना मारायचंय, असा आरोप खासदार संजय राऊतांनी केलाय. तर मराठा मोर्चाला मूक मोर्चा म्हणाऱ्यांना मराठा आंदोलनावर बोलण्याचा अधिकार नाही, अशी टीका भाजपनं ठाकरेसेनेवर केलीय. दुसरीकडे जरांगेंच्या उपोषणाला 12 दिवस पूर्ण होऊनही सरकार मागण्यांसंदर्भात ठोस निर्णय घेत नसल्यानं मराठा आंदोलक आक्रमक झालेत. याचे सर्वाधिक पडसाद मराठवाड्यात उमटले आहेत.

धाराशिवच्या उमरगा तहसील कार्यालयात मराठा आऱक्षणाच्या मागणीसाठी आंदोलकांनी थेट तहसीलदारांच्या खुर्चीला आग लावून तीव्र निषेध व्यक्त केलाय. जालन्यातील गेवराई बाजार येथेही आंदोलकांनी आक्रमक पवित्रा घेतला. आंदोलकांनी पाण्याच्या टाकीवर चढून ठिय्या मांडला, तर तिकडे नांदेडमध्ये मराठा आंदोलकांनी नांदेड-नागपूर महामार्ग रोखून धरत रास्ता रोको केला. तब्बल तासभर चाललेल्या या आंदोलनामुळे महामार्गावर वाहनांच्या लांबच लांब रांगा लागल्या होत्या.

सोलापुरात तर विद्यापीठासमोरील पाण्याच्या टाकीवर चढत मराठा आंदोलकांनी शोले स्टाईल आंदोलन केलं. तर दुसरीकडे मराठा आरक्षणासाठी एका तरुणानं आत्महत्या केलीय.ज्यामुळे लातूरमध्ये मराठा समाज रस्त्यावर उतरला. त्यामुळे मराठा आरक्षणाचा मुद्दा आणखीनच चिघळणार असल्याचं दिसतंय.

सरकारनं जरांगेंच्या 15 पैकी 12 मागण्य़ा मान्य केल्यात. मात्र तरीही पूर्ण मागण्या मान्य होईपर्यंत उपोषणावर कायम राहणार असल्याची भूमिका जरांगेंनी घेतलीय...त्यामुळे जरांगेंच्या आमरण उपोषणाच्या पवित्र्यामुळे त्यांचा जीव धोक्यात येण्याची शक्यता नाकारता येत नाही. सरकारनं जरांगेंची भेट घेणार नसल्याची भूमिका घेतल्यामुळे मराठा आंदोलक आणखीनच आक्रमक झाले आहेत. त्यामुळे सरकारनं तोडगा काढला नाही तर आंदोलन राज्यभर पसरण्याची शक्यता आहे.