Gondiya Accident News: सध्या लग्नसराईचा हंगाम जोमात सुरू आहे. लाडक्या मुलाचं किंवा मुलीचं लग्न असल्याने अनेकजण खरेदी करण्यासाठी तसंच लग्नाचं निमंत्रण देण्यासाठी घराबाहेर पडत आहे. अशातच गोंदिया जिल्ह्यातून एक भयानक घटना समोर आली आहे. मुलीच्या लग्नाच्या पत्रिका वाटायला दुचाकीवरून निघालेल्या दाम्पत्याला भरधाव बोलेरोने जोरदार धडक दिली. (Breaking Marathi News)

या धडकेत नवऱ्या मुलीच्या वडिलांचा जागीच मृत्यू झाला. तर आई गंभीर जखमी झाली आहे. मन सुन्न करणारी ही घटना सोमवारी दुपारीच २ वाजेच्या सुमारास तिरोडा तालुक्यातल्या पांजरा गावाजवळ घडली. नरेश बोपचे असं अपघातात मृत्यू झालेल्या मुलीच्या वडिलांचे नाव आहे. तर वंदना बोपचे, असं जखमी झालेल्या आईचं नाव आहे. (Latest Marathi News)

घरात लग्नसमारंभाची तयारी सुरू असताना, दाम्पत्यावर अचानक काळाने घाला घातल्याने परिसरातून हळहळ व्यक्त होत आहे. मिळालेल्या माहितीनुसार, तिरोडा तालुक्यातील खूरखुडी येथील नरेश फागुराम बोपचे यांच्या मुलीचं लग्न ठरलं होतं.

मुलीच्या लग्नाच्या पत्रिका वाटण्यासाठी ते आपल्या पत्नीसह दुचाकीवरून पाहुण्यांकडे जाण्यासाठी निघाले होते. दरम्यान, खुरखुडीवरून पांजरा बस स्टॉप (Gondiya News) जवळून मौजा बीर्सी- तिरोडाकडे जात असताना पाठीमागून येणाऱ्या बोलेरो पिकअपने त्यांच्या दुचाकीला जोरदार धडक दिली. ही धडक इतकी भीषण होती की, दुचाकीवरील दोघेही दूर फेकले गेले.

या भयानक अपघातात नरेश बोपचे यांचा जागीच मृत्यू झाला. तर त्यांच्या पत्नी वंदना या गंभीर जखमी झाल्या. अपघाताची माहिती मिळताच, स्थानिक पोलिसांनी घटनास्थळी धाव घेतली. पोलिसांनी नरेश यांचा मृतदेह ताब्यात घेतला असून वंदना यांना उपचारासाठी गोंदिया येथील रुग्णालयात दाखल केले. या घटनेनं परिसरातून हळहळ व्यक्त होत आहे.

Edited by - Satish Daud