गोंदिया : गोंदिया (Gondiya) नगर परिषदेच्या सेवानिवृत्त शिपायाला 40 हजार रुपयांची लाच घेताना (Crime) लाचलुचपत पथकाने अटक केली आहे. शिपायाला अटक होताच लाच मागणारा बाजार निरीक्षक मात्र फरार झाला आहे. टीकाराम मेश्राम (वय 60 वर्ष) असे अटक केलेल्या सेवानिवृत्त शिपायाचे नाव आहे. तर, मुकेश मिश्रा असे फरार बाजार निरीक्षकाचे नाव आहे. पोलीस त्याचा शोध घेत आहेत. (Gondiya Latest Crime News)

मिळालेल्या माहितीनुसार, तक्रारदार व्यक्तीचे गंज बाजार येथे मालकीचे दुकान आहे. दुकानाची नोटरी करून तक्रारदाराला दुकान आपल्या मुलाच्या नावावर करायचे होते. यासाठी 30 हजार रुपये द्यावे लागतील असे मुकेश मिश्रा याने तक्रारदाराला सांगितले होते. ही लाच सेवानिवृत्त शिपाई टीकाराम मेश्राम यांच्याकडे देण्यात यावी असे मिश्रा याने सांगितले होते. तक्रारदाराची लाच देण्याची मुळीच इच्छा नसल्याने त्यांनी गोंदिया लाचलुचपत प्रतिबंधक विभागाकडे तक्रार दाखल केली.

दरम्यान, लाचलुचपत पथकाने सापळा रचत सेवानिवृत्त शिपाई मेश्राम याला नगरपरिषद गोंदिया येथे लाच स्वीकारताना रंगेहाथ पकडले. मेश्राम याला अटक झाल्याची भनक लागताच बाजार निरीक्षक मुकेश मिश्रा हा फरार झाला आहे. पोलीस आता त्याचा शोध घेत आहेत. दरम्यान, लाचलुचपत पथकाने आरोपी टीकाराम मेश्राम आणि मुकेश मिश्रा या दोघांविरोधात गुन्हा दाखल केला आहे. सध्या आरोपी मेश्राम याला अटक करण्यात आली असून पोलीस मिश्रा याचा शोध घेत आहेत. या घटनेनंतर नगर परिषदेत किती भष्टाचार सुरु आहे, हे पुन्हा एकदा सिद्ध झाले आहे.