चंद्रपूर जिल्ह्यातील ब्रह्मपुरी तालुक्यातील उचली शिवारात एक धक्कादायक घटना घडली आहे. एका प्रेमीयुगुलाने वीज टॉवरला गळफास लावून आत्महत्या केल्याची घटना समोर आली आहे.

रोहित (वय २५) आणि १४ वर्षीय मुलीनं आपले आयुष्य संपवलं. उचली येथे राहणाऱ्या रोहितचे एका अल्पवयीन मुलीसोबत प्रेमसंबंध होते. ही मुलगी भंडारा जिल्ह्यातील एका वसतिगृहात राहत होती. ती नववीत होती. तिचे आई-वडील मजुरी करून उदरनिर्वाह करत होते.

काही दिवसांपूर्वी ती वसतिगृहातून आपल्या घरी आली होती. त्या दिवशी तिचे वडील मजुरीसाठी बाहेर गेले होते आणि आई घरकामात व्यस्त होती. त्याचवेळी रोहित सकाळी दुचाकीवर तिच्या घरी आला आणि तिला घराबाहेर बोलावले. त्यानंतर तिला दुचाकीवर बसवून नेले.

आई-वडिलांनी तिच्या मोबाइलवर संपर्क करण्याचा प्रयत्न केला, मात्र संपर्क होऊ शकला नाही. त्यामुळे त्यांनी ब्रह्मपुरी पोलीस ठाण्यात तक्रार नोंदवली. दरम्यान, उचली शिवारातील एका वीज टॉवरला गळफास घेतलेल्या अवस्थेत युवक-युवतीचे मृतदेह आढळून आले. परिसरातील काही नागरिकांनी याबाबत तात्काळ पोलिसांना माहिती दिली.

पोलिसांनी घटनास्थळी पोहोचून मृत प्रेमीयुगुलाची ओळख पटवली. त्यानंतर त्यांच्या कुटुंबीयांना बोलावून पंचनामा करण्यात आला. सध्या या प्रकरणाचा तपास ब्रह्मपुरी पोलीस करीत आहेत.

Edited By - Purva Palande