Solapur News : सोलापूर पुणे महामार्गावर (Solapur Pune Highway Accident News) आज (शुक्रवार) दुपारच्या सुमारास एक विचित्र अपघात झाला. या मार्गावर रस्त्यातच एक डंपर थांबल्यामुळे त्यापाठाेपाठ येणा-या चार वाहनांचा अपघात झाला. या घटनेत एक जण जागीच ठार झाला आहे. या अपघाताची माहिती समजताच पाेलिस घटनास्थळी दाखल झाले. (Maharashtra News)

पाेलिसांकडून आणि घटनास्थळावरुन मिळालेली माहिती अशी - सोलापूर पुणे हायवे महामार्गावर बाळे येथे अनाधिकृतपणे एक डंपर थांबल्याने हा अपघात झाला. या डंपरमागील कार ,दुचाकीसह चार वाहन एकमेकांना धडकली. त्यामुळे वाहतुक जागेवर थांबली.

या अपघातानंतर ग्रामस्थांनी घटनास्थळी धाव घेतली. त्यांनी अपघातग्रस्तांची चाैकशी केली. यावेळी काही ग्रामस्थांनी पुणे महामार्गावर ठिय्या आंदोलन केले. त्यामुळे सोलापूर पुणे महामार्गावर वाहनांच्या रांगा लागल्या. पोलिसांनी चेकिंग पॉईंटला बॅरिकेटिंग केल्याने हा अपघात झाल्याचा दावा आंदोलकांनी केला. पाेलिसांनी त्यांची समजूत काढून रस्ता माेकळा करण्याची विनंती केली. त्यानंतर वाहतुक सुरळीत झाली.

दरम्यान पोलिसांनी क्रेनच्या साह्याने अपघात झालेली वाहने रस्त्यातून बाजूला काढली. या अपघातात तीन जण जखमी झाले आहेत. त्यांना सिव्हिल रुग्णालयत दाखल करण्यात आले आहे. तसेच अपघातात एक जण मृत्यूमुखी पडल्याची माहिती विजय कबाडे (पोलीस उपायुक्त,सोलापूर) यांनी दिली.

Edited By : Siddharth Latkar