- जितेश कोळी

Lote Midc Fire News : रत्नागिरी जिल्ह्यातील सर्वात मोठी रासायनिक औद्योगिक वसाहत असलेल्या लोटे एमआयडीसी येथील अरोमा इंटरमिजीएट्स कंपनीमध्ये रिएक्टरमधील केमिकल अचानक पेट घेतल्याने कंपनीच्या काही भागास भीषण आग लागली. (Maharashtra News)

गेल्या पाच दिवसांपासून लोटे एमआयडीसी येथील पाणी पुरवठा ठप्प असल्याने रासायनिक कंपन्यांमधील रिऍक्टर थंड करण्यासाठी पाण्याची कामतरता येथील कंपन्यांना भासत आहे. आज आरोमा कंपनीमध्ये झालेल्या आगीच्या दुर्घटनेत सुदैवाने कोणी जखमी झाले नसले तरी कंपनीचे लाखो रुपयांचे नुकसान झाले आहे.

रत्नागिरीच्या लोटे एमआयडीसीच्या अग्निशमन दलाने कंपनीला लागलेल्या आगीवर नियंत्रण मिळवले असून घटनास्थळी पोलीस दाखल झाले. पाेलिसांकडून पंचनामा करण्याचे काम सुरु करण्यात आले आहे. लोटे एमआयडीसी येथील कंपन्यांना एमआयडीसी विभागाकडून केला जाणारा पाणी पुरवठा वारंवार बंद ठेवला जात असल्याने अशा प्रकारच्या दुर्घटना दरवर्षी मोठ्या प्रमाणात घडत असतात.

Edited By : Siddharth Latkar