औरंगाबाद : राज्यात १० ऑक्टोबर २०२१ रोजी टीईटी (TET Exam) म्हणजेच शिक्षक पात्रता परीक्षा आयोजित करण्यात आली होती. मात्र, त्याचदिवशी यूपीएससी (UPSC) प्रिलीमची परीक्षा असल्यानं राज्य परीक्षा परिषदेने टीईटी परीक्षा पुढे ढकलण्याचा निर्णय घेतला आहे. आता १० ऑक्टोबर २०२१ ऐवजी ३१ ऑक्टोबर २०२१ रोजी टीईटीच्या परीक्षा घेण्यात येणार आहे. १० ऑगस्ट रोजी साम टीव्ही न्यूजने 'टीईटी आणि यूपीएससी परीक्षा एकाच दिवशी; विद्यार्थ्यी संभ्रमात' यावर बातमी दाखवली होती. विद्यार्थ्यांची ही अडचण लक्षात घेऊन अखेर परीक्षा परिषदेने परीक्षा पुढे ढकलण्याचा निर्णय घेतल्याने टीईटी आणि यूपीएससी परीक्षा देणाऱ्या विद्यार्थ्यांना दिलासा मिळाला आहे.

हे देखील पहा :

राज्यात डीएड आणि बीएड पात्रताधारक भावी शिक्षकांसाठी १० ऑक्टोबर २०२१ रोजी टीईटी म्हणजेच शिक्षक पात्रता परीक्षा घेण्यात येणार होती. त्याच दिवशी युपीएससी म्हणजे केंद्रीय लोकसेवा आयोगाची परीक्षा असल्याने या दोन्ही परीक्षेसाठी अर्ज केलेल्या उमेदवारांना परीक्षा कोणती द्यायची असा प्रश्न पडला होता. १० ऑगस्ट रोजी साम टीव्ही न्यूजने यावर बातमी दिल्यानंतर महाराष्ट्र राज्य परीक्षा परिषदेने याबाबत निर्णय घेतला आहे. महाराष्ट्र शिक्षक पात्रता परीक्षेने तारखेत बदल केलेले परिपत्रक आपल्या वेबसाईटवर टाकले असून आता १० ऑक्टोबर ऐवजी ३१ ऑक्टोबर रोजी टीईटी होणार आहे.

महाराष्ट्र शिक्षक पात्रता परीक्षा २०२१ चे सुधारित वेळापत्रक :

प्रवेश पत्र ऑनलाइन प्रिंट काढून घेणे : १४ ऑक्टोबर २०२१ ते ३१ ऑक्टोबर २०२१

शिक्षक पात्रता परीक्षा पेपर 1 : ३१ ऑक्टोबर २०२१, वेळ सकाळी साडेदहा ते एक

शिक्षक पात्रता परीक्षा पेपर 2 : ३१ ऑक्टोबर २०२१, वेळ दुपारी २ ते ४:३०

Edited By : Krushnarav Sathe