अहिल्यानगर: अहिल्यानगर जिल्ह्यातील नेप्ती येथील भाविक कुंभमेळ्यासाठी प्रयागराजला निघाले होते. मात्र, पार्किंगमध्ये उभी असलेली त्यांची बस आरटीओ अधिकाऱ्याने ताब्यात घेतली, दंडात्मक कारवाई करून ती आरटीओ कार्यालयात लावली.

यावेळी संबंधित अधिकाऱ्याने, "आप प्रयागराज कैसे जाते, अब मैं देखती हूँ" असे म्हणत कारवाई केली, असा आरोप भाविकांनी केला आहे. अचानक बस जप्त केल्यामुळे भाविकांचे कुंभमेळ्याचे नियोजन बिघडले आणि त्यांना प्रयागराजला जाता आले नाही.

या घटनेचा राष्ट्रवादी काँग्रेस – अजित पवार गटाने तीव्र निषेध करत आरटीओ कार्यालयासमोर आंदोलन छेडले. संतप्त कार्यकर्त्यांनी कार्यालयाला टाळे ठोकून अधिकाऱ्यांच्या विरोधात घोषणाबाजी केली.

"कारवाई जाणून-बुजून करण्यात आली आहे. दोषी अधिकाऱ्यांवर कठोर कारवाई झाली नाही, तर मोठे आंदोलन उभारू," असा इशारा राष्ट्रवादी काँग्रेसच्या पदाधिकाऱ्यांनी दिला आहे.