Summary -

• पंचतारांकित हॉटेलमधून हवाला रॅकेट चालवल्याचा आरोप

• सीएच्या नावावर वर्षभरासाठी महागडी रूम बुक

• कोट्यवधींचे आर्थिक व्यवहार संशयाच्या भोवऱ्यात

• ईडीच्या चौकशीची शक्यता, राजकीय संबंधांची तपासणी

भोंदू खरातच्या हवाला रॅकेटबाबत नवी माहिती समोर आलीय... खरात मुंबईतून हवाला रॅकेट कसं चालवायचा ? या रॅकेटमध्ये खरातला कोण मदत करत होतं? खरातच्या सीएनं पंचतारांकित हॉटेलमधील रुम 365 दिवसांसाठी का बुक केली होती ? पाहूयात या स्पेशल रिपोर्टमधून...

अध्यात्माच्या नावाखाली कोट्यवधींची माया जमवणाऱ्या अशोक खरातचे धागेदोरे आता थेट पंचतारांकित हॉटेलपर्यंत पोहोचलेत. मुंबईत कोट्यवधीचं भाडं भरून खरात आलिशान हॉटेलमधून हवाला रॅकेट चालवत असल्याचं उघड झालंय.

खरातच्या सीएच्या नावावर मुंबईतील एका पंचतारांकित हॉटेलमध्ये विशेष रुम बुक असायची. या हॉटेलमध्ये बाराही महिने सीएसाठी रूम राखीव असायची. या पंचतारांकित रूमचं एका दिवसाचं भाडं 20 ते 25 हजार रुपयांच्या घरात असल्याची माहिती आहे...याच आलिशान रुममध्ये खरातच्या उपस्थितीत दिग्गज राजकीय नेते, उद्योजकांच्या बैठका होत असल्याचा संशय आहे. त्यामुळे याच रूममधील कोट्यावधींच्या आर्थिक गैरव्यवहाराचा आणि हवाला रॅकेटचा तपास सुरु आहे.

विशेष म्हणजे या हॉटेलच्या रुमसाठी एक कोटीहून अधिक भाडं खरात नेमकं का भरत होता ? याचा तपास यंत्रणांकडून शोध सुरु आहे. आधीच दुबईतील सराफामार्फत खरात हवाला रॅकेट चालवत असल्याची माहिती समोर आलेली असताना या नव्या माहितीनं खरात ईडीच्या रडारवर आलाय. खुद्द मुख्यमंत्र्यांनीच खरातची ईडी चौकशी होणार असल्याची माहिती दिलीय.

दरम्यान खरात मुंबईतील ज्या हॉटेलमधून हवाला रॅकेट चालवायचा. त्या हॉटेलचे सीसीटीव्ही फुटेज तपासले जाणार का? खरातला भेटायला येणारे 'ते' दिग्गज नेते आणि उद्योजक कोण होते? सीएच्या माध्यमातून चालणाऱ्या या व्यवहारांची मूळं कुठं आहेत? या सगळ्या प्रश्नांची उत्तर तपासातून समोर येणं गरजेचं आहे.