महापालिका निवडणुकीच्या पार्श्वभूमीवर राज आणि उद्धव ठाकरे एकत्र येण्याची चर्चा सुरू असतानाच शिंदेंनी ठाकरे बंधूंच्या युतीत खोडा घालण्याची नवी रणनीती आखल्याची चर्चा सुरु झालीय. एकनाथ शिंदेंचे निकटवर्तीय मंत्री उदय सामंत यांनी शिवतीर्थावर जाऊन राज ठाकरेंची भेट घेतली. शिंदें सेनेकडून राज ठाकरेंना युतीचा प्रस्ताव देण्यासाठीच ही भेट घेतल्याची चर्चा राजकीय वर्तुळात होतेय. सुमारे तासभर शिंदेसेना आणि मनसेत युतीसंदर्भात चर्चा सुरू होती. मात्र उदय सामंतांनी राजकीय भेट नसल्याचा दावा केलाय.

दुसरीकडे उदय सामंतांनी दिलेलं पुष्पगुच्छ राज ठाकरेंनी स्विकारलं नसल्याची चर्चा आहे. त्यामुळे विधानसभेत शिंदेसेनेमुळे बसलेला फटका राज ठाकरे अद्याप विसरलेले दिसत नाहीयत. शिंदेसेनेने दिलेल्या उमेदवारामुळे अमित ठाकरे यांचा माहिम मतदारसंघात पराभव झाला. त्यामुळे राज ठाकरेंनी सध्या वेट अँण्ड वॉचचीच भूमिका घेतलीय.

एका मुलाखतीत राज ठाकरेंनी उद्धव ठाकरेंना साद घातली आणि त्याला उद्धव ठाकरेंनी प्रतिसाद दिला. आता दोन्ही ठाकरे परदेश दौरा आटोपून आलेत..मात्र चर्चा काही पुढे सरकलेली नाही,. आणि त्यामुळेच त्यांच्या दुसऱ्या प्रतिसादाची वाट पाहत असल्याचं सांगत संजय राऊतांनी राज ठाकरेंच्या कोर्टात युतीचा चेंडू टोलवलाय.

ठाकरे बंधू एकत्र आल्यास महायुतीला महापालिका निवडणुकीत फटका बसू शकतो. त्यामुळे शिंदेसेनेने युतीचा प्रस्ताव ठेवलाय, अशी चर्चा आहे. त्यात राज ठाकरेंनी अद्याप कुणाच्याच युतीचा प्रस्ताव स्विकारलेला नाही. पुढील रणनिती आखूनच राज ठाकरे युती करतील. मात्र ठाकरे बंधूंच्या युतीचं पुढे काय होणार? आणि महायुतीकडूनही युतीचा प्रस्ताव आल्यानं राज ठाकरे पुन्हा महायुतीच्याच तंबूत जाणार का? याकडे लक्ष लागलयं.