संजय जाधव, साम प्रतिनिधी

बुलढाण्याचे शिंदे गटाचे आमदार संजय गायकवाड यांना स्टंट करणं त्यांच्या अंगाशी आले आहे. वाढदिवसाला तलवारीने केक कापणं आणि तलवारीनेच इतरांना केक भरवणं त्यांना महागात पडलंय. बुलढाणा शहर पोलीस स्टेशनमध्ये आमदार संजय गायकवाड यांच्यासह तिघांविरोधात गुन्हा दाखल करण्यात आलाय. मुंबई पोलीस कायदा १३५ अन्वये कलम ३७ (१) (३) नुसार हा गुन्हा दाखल करण्यात आलाय.

काय आहे प्रकरण जाणून घ्या

हाती आलेल्या माहितीनुसार, दोन दिवसापूर्वी म्हणजेच शुक्रवारी संजय गायकवाड यांच्या मुलाचा वाढदिवस होता. त्यावेळी आमदार गायकवाड यांनी हजारो नागरिकांसमोर तलवारीने केक कापला आणि आपल्या पत्नीला व इतरांना तलवारीनेच केक भरवला होता. याप्रकरणी पोलिसांनी सुमोटो घेत सार्वजनिक ठिकाणी शस्त्र प्रदर्शन केल्या प्रकरणी केला गुन्हा दाखल करण्यात आल्याची माहिती अतिरिक्त पोलिस अधीक्षक बी.बी.महामुनी यांनी दिलीय.

व्हिडिओ व्हायरल

बुलढाण्याचे शिंदे गटाचे आमदार संजय गायकवाड यांचे सुपुत्र, मृत्युंजय गायकवाड यांचा गुरुवारी वाढदिवस धुमधडाक्यात साजरा करण्यात आला. गुरुवारी रात्री झालेल्या या कार्यक्रमात आमदार संजय गायकवाड यांनी भल्या मोठ्या तलवारीने स्टेजवर केक कापला. याच तलवारीने कापलेला केक आपली पत्नीला भरविला. या सर्व कार्यक्रमाचा व्हिडिओ सोशल मीडियात व्हायरल झालेत. सामान्य व्यक्तीने तलवारीने केक कापल्यास त्या व्यक्तीवर आर्म ॲक्टनुसार गुन्हा दाखल होतो.

याआधीही दाखल झालाय गुन्हा

शिवसेना शिंदे गटाचे आमदार संजय गायकवाड यांच्यासह त्यांचे पुत्र मृत्यूंजय गायकवाड, सोमनाथ चौबे, दिपाली चौबे आणि ज्ञानेश्वर वाघ यांच्यावर आधीही गुन्हा दाखल करण्यात आलाय. शेती बळकावल्याच्या आरोपाखाली दिवाणी आणि फौजदारी न्यायालयाने हे आदेश दिले होते. आमदार संजय गायकवाड यांच्यावर नागपूर येथील रीटा उपाध्याय यांनी राजूर येथील दीड एकर शेतजमीन बळकावल्याचा आरोप केला होता.

त्या शेतावर आमदार संजय गायकवाड यांनी फार्म हाऊस बांधलंय. तसेच संबंधित महिलेला जिवे मारण्याची धमकीसुद्धा देण्यात आल्याचे समोर आले होते. पोलीस कारवाई करत नसल्याने हे प्रकरण उच्च न्यायायात दाखल करण्यात आले होते. यावर मोताळा येथील दिवाणी व फौजदारी न्यायालयाने कारवाईचे आदेश दिले होते.