सोलापूर : 'पूर्वीची भाजप ही भ्रष्टाचारमुक्त आणि गुन्हेगारमुक्त अशा चौकटीतील होती, अगदी माझ्यावर भ्रष्टाचाराचा आरोप झाल्यानंतर तातडीनं मंत्रीपदाचा राजीनामा घेतला होता. मात्र, आता जेलमध्ये जाऊन आलेले किंवा ईडी चौकशीत अडकलेले लोक पक्षात घेतले जात आहेत. अगदी दाऊदचा हस्तक असलेला सलीम कुत्तासोबत नाचणाऱ्या सुधाकर बडगुजरला देखील भाजपमध्ये घेतले हे अति झालं', अशा शब्दात राष्ट्रवादीचे आमदार आणि ज्येष्ठ नेते एकनाथ खडसे यांनी भाजप नेतृत्वावर खरमरीत टीका केलीय. भाजपमध्ये आज ९० टक्के लोकं हे बाहेरचे असून विविध आरोप झालेले असल्याची टीका स्वतः एकनाथ खडसे यांनी केली. दरम्यान, खडसे यांनी केलेल्या टीकेवरुन मंत्री गिरीश महाजन यांनीही तिखट पलटवार केला आहे. 'ते राष्ट्रीय नेते आहेत, मी लहान कार्यकर्ता', असल्याचं महाजन यांनी म्हटलं आहे.

पंढरपूरमध्ये विठुरायाचं दर्शन घेण्यासाठी एकनाथ खडसे आले होते, तेव्हा त्यांनी माध्यमांशी संवाद साधला. 'ज्या भ्रष्ट नेत्यांच्या विरोधात मी विरोधी पक्षनेता असताना टीका केली होती, ते आज पक्षात असून ७० हजार कोटी रुपयांच्या भ्रष्टाचाराचे आरोप देवेंद्र फडणवीस यांनी केले होते, तेही आज यांच्यासोबत आहेत', असा टोला खडसेंनी मुख्यमंत्र्यांना लगावला. विशेष म्हणजे आजच त्यांच्या सुनबाई आणि केंद्रीय क्रीडा मंत्री रक्षा खडसे यादेखील पंढरपूरमध्ये आल्या होत्या. त्या पंढरपुरातून गेल्यानंतर दुपारी एकनाथ खडसे हेही पंढरपूरमध्ये आले. यावेळी बोलताना, 'भाजप हा विषय माझ्यासाठी पूर्णपणे संपला असून मी अंधारात असताना मला साथ देणाऱ्या शरद पवारांसोबतच मी राहणार असल्याचा पुनरुच्चार खडसे यांनी केला'.

दरम्यान, 'भाजपच्या विरोधात दोन ठाकरेंनी एकत्र आलंच पाहिजे. याशिवाय सत्ताधाऱ्यांना विरोध करणाऱ्या सर्वांनी एकत्र आल्यास आगामी निवडणुकात चांगले यश मिळेल', असा विश्वास एकनाथ खडसे यांनी व्यक्त केला.

गिरीश महाजनांचा खडसेंवर पलटवार

'सुधाकर बडगुजर यांचा प्रवेश झाल्यावर एकनाथ खडसे म्हणाले त्यापेक्षा मी वाईट नाही, मला का घेत नाहीत. खडसे पक्षात येण्यासाठी किती उत्सुक आहेत हे दिसतं', असा पलटवार मंत्री गिरीश महाजन यांनी केला. तसेच, 'मी लहान कार्यकर्ता आहे, ते दिल्लीत बोलले, त्यांचे कनेक्शन दिल्लीत आहे. मी त्यांच्याबद्दल काही टिपणी करणार नाही, कारण ते राष्ट्रीय नेते आहेत'. दिल्लीत त्यांनी भाजपचा दुपट्टा गळ्यात टाकल्याचं त्यांनी सांगितलं होतं. पण, त्याचे फोटो समोर येत नसल्याचा टोलाही महाजन यांनी लगावला.