संघर्ष गांगुर्डे, साम टीव्ही

रेल्वे वाहतूक ही मुंबई, ठाणे उपनगराची लाईफ लाईन म्हणून ओळखली जाते. मात्र मुंबई ठाणे उपनगरातील रेल्वे स्थानकातून नोकरदार वर्गाला कामावर जाण्यासाठी लोकल पकडण्यासाठी तारेवरची कसरत करावी लागते. याच रेल्वे स्थानकाबाहेर फेरीवाल्यांचा गराडा आणि वाहतूक कोंडीतून मार्ग काढावा लागतो. रेल्वे प्रवाशांची व्यथा डोंबिवलीतील तरुणाने गणपतीच्या देखाव्यातून मांडली आहे.

रेल्वे स्थानकावर वेळेप्रसंगी घाई गडबडीत लोकल पकडण्यासाठी धावपळ करताना फेरीवाल्यांशी वादही निर्माण होतात. त्यामुळे प्रवाशांना होणाऱ्या त्रासाकडे लक्ष वेधण्याचा देखाव्यातून प्रयत्न डोंबिवलीतील तरुण रुपेश राऊत याने केला. कुठे तरी हा त्रास कमी होण्यासाठी या देखाव्याच्या माध्यमातून गणपती बाप्पा चरणी प्रार्थना केलीये.

रेल्वे स्टेशन परिसर फेरीवाला मुक्त झाला पाहिजे न्यायालयाने ठरवून दिलेल्या रेल्वे स्टेशन परिसरापासून 150 मीटर अंतरावर फेरीवाल्यांना त्याचा व्यवसाय करण्यासाठी बसू दे. तसेच स्टेशन परिसरात रिक्षांना ठरवून दिल्या जागेवरून प्रवासी वाहतूक करण्यास मुभा द्यावी जेणे करून सामान्य माणसांना आपला प्रवास सुखकर करता येईल, असे त्यांनी सांगितले.

रुपेश राऊतने स्टेशनबाहेरील अनधिकृत फेरीवाले, वाहतूक कोंडीमुळे उडालेला फज्जा, ध्वनी प्रदुषणाचे मुद्दे देखाव्यातून मांडले. रुपेशने केलेल्या देखाव्याची चर्चा संपूर्ण डोंबिवलीमध्ये होत आहे. लोक मोठ्या आवडीने रुपेश राऊतच्या घरातील देखावा पाहायला येत आहे.