शिरपूर (धुळे) : सायबर गुन्हेगारांकडून गंडविण्याच्या इराद्याने वेगवेगळ्या लिंक किंवा फाईल मोबाईलवर पाठविल्या जातात. अशाच प्रकारे पाठविण्यात आलेल्या फाईलवर मोबाईल पाहत असताना फाईलवर क्लिक झाले आणि फाइल डाउनलोड झाली. हीच संधी साधत सायबर गुन्हेगारांनी मोबाईल हॅक केला. यानंतर घडलेल्या प्रकाराने तरुण हादरला. काही वेळातच या तरुणाने टोकाचा निर्णय घेत आत्महत्या केल्याची घटना घडली आहे.  

धुळे जिल्ह्यातील शिरपूर तालुक्यात सदरची घटना घडली आहे. शिरपूर तालुक्यातील ताजपूरी या गावातील किशन उर्फ बंटी जितेंद्र सनेर (वय १९) असे मृत युवकाचे नाव आहे. घरात एकुलता मुलगा असून तो फार्मसी पदविका महाविद्यालयात दुसऱ्या वर्षात शिकत होता. दरम्यान ५ जुलैला त्याने घराच्या वरच्या मजल्यावर छताला साडीने गळफास घेतला. त्याचे आई-वडील शेती करून उदरनिर्वाह करतात. ते शेतातून परतल्यावर हा प्रकार उघडकीस आला. 

फाईल डाऊनलोड होताच मोबाईल हॅक  
दरम्यान ५ जुलैला दुपारी बंटी हा मित्रांसोबत बसला होता. यावेळी तो व्हॉट्‌सअ‍ॅपवरील संदेश पाहत असताना त्याच्याकडून एपीके फाइलवर अनावधानाने क्लीक करण्यात आले. यामुळे काही वेळातच फाइल डाउनलोड झाली. या नंतर सायबर गुन्हेगाराने मोबाईल हॅक करत व्हॉट्‌सअ‍ॅपसह गॅलरीतील डाटाचे संपूर्ण नियंत्रण मिळविले. लागलीच त्यांनी मोबाईलमधील सर्व ग्रुप व खासगी अकाउंटवर आक्षेपार्ह फोटो प्रसारित केले. 

बदनामीच्या भीतीने उचलले टोकाचे पाऊल  

मोबाईल हॅक झाल्याने सायबर गुन्हेगारांनी बंटीच्या सर्व सोशल मीडिया अकाउंटवर आक्षेपार्ह फोटो अपलोड केले. हे सर्व चित्र पाहून आपली बदनामी होईल; या भीतीतून बंटीला मोठा धक्का बसला. यातून त्याने टोकाचा निर्णय घेत आत्महत्या केल्याचा अंदाज आहे. या प्रकरणी थाळनेर पोलिस ठाण्यात मृत्यूची नोंद करण्यात आली असून, सहाय्यक निरीक्षक शत्रुघ्न पाटील तपास करीत आहेत.