धुळ्यातील साक्री येथील गणेशपूर परिसरात अपघाताची घटना घडली आहे. कांदे भरलेला ट्रॅक्टर ट्रॉलीसह विहिरीत कोसळला. प्राथमिक माहितीनुसार, त्या ट्रॅक्टर ट्रॉलीमध्ये काही लहान चिमुकले खेळत होते. दरम्यान, ट्रॅक्टर ट्रॉली पाण्याने तुडूंब भरलेल्या विहिरीत कोसळल्यामुळे तीन चिमुकलेही विहिरीत पडले. एका २ वर्षीय चिमुकलीचा शोध लागला असून, इतर दोन लहान मुलांचा शोध सुरू आहे. या घटनेची माहिती मिळताच पोलिसांनी घटनास्थळी धाव घेतली. सध्या पोलिसांकडून अधिक तपास सुरू आहे.

मिळालेल्या माहितीनुसार, खुशी दाजू ठाकरे (वय वर्ष ३) आणि ऋतिरा संदीप गायकवाड (वय वर्ष ३) असे विहिरीतल्या पाण्यात बेपत्ता असलेल्या चिमुकल्यांची नावे आहेत. तर, परी संदीप गायकवाड या २ वर्षीय चिमुकलीचा शोध लागला आहे. ही घटना दुपारच्या सुमारास घडली असल्याची माहिती आहे.

प्राथमिक माहितीनुसार, गणेशपूर परिसरात कांदा चाळीतील कांदे ट्रॅक्टर ट्रॉलीमध्ये भरण्याचे काम सुरू होते. मजुरांचे काम सुरू असताना, काही चिमुकले ट्रॅक्टर ट्रॉलीमध्ये खेळत होते. दरम्यान, ट्रॅक्टर ट्रॉली अचानक सुरू झाली. ट्रॅक्टर ट्रोली थेट विना कठड्याच्या विहिरीत कोसळली. ही विहीर ६० फूट खोल असून, पाण्याने तुडूंब भरलेली होती.

ही घटना इतकी अचानक घडली की कुणालाही काही समजण्याच्या आत ट्रॅक्टर आणि त्यावरील मुली पाण्यात बुडाल्या. घटनेची माहिती मिळताच आजूबाजूच्या शेतकऱ्यांनी आणि गावकऱ्यांनी विहिरीकडे धाव घेतली. गावकऱ्यांनी शर्थीचे प्रयत्न करून एका मुलीला सुखरूप बाहेर काढले. मात्र, दुर्दैवाने या घटनेत दोन मुली अद्यापही बेपत्ता असून, त्यांचा शोध घेतला जात आहे. सध्या घटनास्थळी स्थानिक प्रशासन दाखल झाले असून, ग्रामस्थांच्या मदतीने बुडालेल्या मुलींचा शोध घेतला जात आहे. या अचानक घडलेल्या दुर्दैवी घटनेमुळे गणेशपूर परिसरात मोठी खळबळ उडाली असून हळहळ व्यक्त केली जात आहे.