धुळे : शिंदखेडा तालुक्यामध्ये गेल्या काही दिवसांपासून डेंग्यू, मलेरिया त्याचबरोबर चिकनगुनिया यासारख्या साथीच्या आजारांनी डोक वर काढल आहे. यासंदर्भात पालिका प्रशासनाकडे वारंवार विविध संघटनांतर्फे तसेच नागरिकांतर्फे उपाययोजना करण्यासाठी निवेदन दिले जात असून नागरिकांच्या मागणीकडे प्रशासनाचे दुर्लक्ष होत आहे. याकरीता आता सामाजिक कार्यकर्तेच सरसावले आहेत. (dhule-news-Social-workers-came-forward-dengue-malaria-increasing-incidence)

डेंगू, मलेरियाचा वाढता प्रादुर्भाव लक्षात घेता गावामध्ये औषध फवारणी करण्यासाठी सामाजिक कार्यकर्त्यांनी पुढे येत गावामध्ये औषध फवारणी केली आहे. सामाजिक कार्यकर्ते शाणाभाऊ कोळी यांनी अखेर डेंग्यूचा वाढता प्रादुर्भाव लक्षात घेता व ग्रामस्थांची मागणी बघता स्वतः स्वखर्चातून कुंभारे येथे युवकांनासोबत घेऊन संपूर्ण गावामध्ये औषध फवारणी केली आहे.

कोरडा दिवस पाळा

डेंग्यूमुळे गावामध्ये मोठ्या प्रमाणात नागरिक हे त्रस्त झाले असताना संबंधित प्रशासनातर्फे कुठल्याही प्रकारची दखल घेतली जात नाही. प्रशासकीय अधिकारी नागरिकांच्या मृत्यूची वाट बघत आहेत का? असा देखील प्रश्न या निमित्ताने शानाभाऊ कोळी यांनी उपस्थित केला आहे. त्याचबरोबर गावकऱ्यांना एक दिवस कोरडा दिवस पाळण्याचे देखील आवाहन कोळी यांनी नागरिकांना केले आहे. प्रशासकीय अधिकाऱ्यांनी दुर्लक्ष केल्यानंतर सामाजिक कार्यकर्ते शानाभाऊ कोळी यांनी नागरिकांना होणारा त्रास लक्षात घेता गावामध्ये औषध फवारणी केल्यामुळे नागरिकांनी समाधान व्यक्त केले आहे.