धुळे : शिवसेनेला फुटीचे ग्रहण लागल्यानंतर शिंदे गटांने आपली वेगळी चूल मांडली. यादरम्यान उद्धव ठाकरे गटाकडून ठाकरे समर्थक शिवसैनिकांतर्फे निष्ठापत्र भरून घेण्यात आले. यावेळी धुळ्यातील (Dhule) एका शिवसेनेच्या निष्ठावाने थेट आपल्या रक्तानेच निष्ठापत्र लिहून उद्धव ठाकरे (Uddhav Thackeray) यांना मातोश्रीवर पाठविले. या शिवसैनिकाला ठाकरेंनी मातोश्रीवर बोलावून भेट घेतली. (Dhule Shiv Sena News)

रक्ताने लिहून पाठवलेल्या निष्ठापत्राची दखल माजी मुख्यमंत्री उद्धव ठाकरे यांनी घेत या निष्ठावान शिवसैनिकाला (Shiv Sena) मातोश्रीवरून बोलवणं धाडण्यात आले. त्यानंतर मनोज गवळी या शिवसैनिकाच्या पाठीवर शाब्बासची थाप देत उद्धव ठाकरे यांनी त्यांची गळेभेट घेतली. या भेटीनंतर मनोज गवळी हे पूर्णपणे भारावून गेले. मनोज गवळी हे धुळ्यातील (MSRTC) परिवहन विभागात वाहक म्हणून कार्यरत आहेत. तसेच एसटी महामंडळात महाराष्ट्र एसटी कामगार संघटनेचे ते पदाधिकारी देखील आहेत.

तासभर केली चर्चा

उद्धव ठाकरे यांनी मातोश्रीवर मनोज गवळी व त्यांच्यासोबत असलेल्या धुळ्यातील शिवसैनिक पदाधिकारी व कार्यकर्त्यांची जवळपास एक ते दीड तास निवांत चर्चा करून त्यांची विचारपूस केली. शिवसेनेला गेल्या काही दिवसांपासून लागलेल्या वळविला दूर करण्यासाठी आपण पूर्णपणे प्रयत्न करणार असल्याचे यावेळी मनोज गवळी यांनी स्पष्ट केले.