धुळे : महाराष्ट्राचा आणि गुजरातचा पहिले इतिहास समजून घ्यावा. संयुक्त महाराष्ट्राचा लढा झाला, त्यावेळी अमित शहा जन्माला आले नव्हते. १०६ हुतात्मे महाराष्ट्राने दिले आहेत आणि वेळ पडली तर आणखीन हुतात्मे देण्याची आमची तयारी आहे. तेव्हा आम्ही मोरारजी देसाई विरुद्ध लढलो होतो. आता अमित शहा आणि मोदी यांच्या विरुद्ध लढावे लागेल; असे म्हणत अमित शहा यांच्या वक्तव्यावर खासदार संजय राऊत यांनी निशाणा साधला आहे. 

केंद्रामध्ये व राज्यामध्ये भाजप सत्तेत असल्यामुळे मुंबई वाचली; असे वक्तव्य केंद्रीय गृहमंत्री अमित शहा (Amit Shah) यांनी केले होते, यावर बोलताना खासदार संजय राऊत (Samjay Raut) यांनी टीका करत अमित शहा यांनी महाराष्ट्र व गुजरातचा इतिहास समजून घेण्याचे सांगितले आहे.  

राज्यात महाविकास आघाडीचे (Mahavikas Aaghadi) राज्य आल्यानंतर पुढील सहा महिन्यात मोदी पंतप्रधान पदावर नसतील हे खात्रीने सांगतो. कारण केंद्र सरकारला पाठिंबा असलेले चंद्रबाबू नायडू व नितीश कुमार यांचा पक्ष महाराष्ट्राच्या निवडणुकीकडे पाहतो आहे. महाराष्ट्रात महाविकास आघाडीचे सरकार आल्यानंतर ते पाठिंब्याबाबत नक्की विचार करतील; असेही राऊत म्हणाले.

अजित पवार, शिंदेंची हि शेवटची निवडणूक 
हि निवडणुक शरद पवारांची शेवटची निवडणूक नाही. मात्र अजित पवार आणि एकनाथ शिंदे यांची ही शेवटची निवडणूक आहे. कारण बारामतीमध्ये अजित पवार यांचा पराभव निश्चित आहे; असे म्हणत अजित पवार यांच्यावर संजय राऊत यांनी निशाणा साधला आहे.