धुळे : धुळे शहर व परिसरातून मोटरसायकल त्याचबरोबर शेतकऱ्यांच्या शेतातील मोटर्स व बॅटऱ्या चोरी करणारी टोळी पोलिसांच्या हाती लागली आहे. स्थानिक गुन्हे अन्वेषण विभागाच्या पथकाने या टोळीच्या मुसक्या आवळल्या असून त्यांच्याकडून मुद्देमाल हस्तगत केला आहे.  

गेल्या काही दिवसांपासून धुळे शहरासह जिल्ह्यात विविध ठिकाणी मोटरसायकल चोरीच्या घटना सातत्याने उघडकीस येत होत्या. या शिवाय शेतशिवारातून विद्युत मोटारी, बॅटरी चोरी झाल्याच्या घटना देखील घडल्या होत्या. याबाबत प्राप्त तक्रारीच्या अनुषंगाने स्थानिक गुन्हे अन्वेषण विभागाच्या पथकाने तपासाची चक्रे (Dhule Police) फिरवली. स्थानिक गुन्हे अन्वेषण विभागाचे पोलीस अधिकारी श्रीराम पवार यांना गुप्त माहिती द्वारा मिळालेल्या माहितीच्या आधारे पथकाने कारवाई केली.  

सात जण ताब्यात 

या दरम्यान सात जणांच्या मुसक्या पोलिसांनी आवळल्या आहेत. त्यांच्याकडून पंधरा मोटरसायकल, एक बॅटरी आणि सहा जलपरी पाण्याची मोटर स्थानिक गुन्हे शाखेच्या पथकाने ताब्यात घेतले आहे. या कारवाई प्रकरणी धुळे तालुका पोलीस ठाण्यात गुन्हा दाखल करण्यात आला असल्याची माहिती धुळे जिल्ह्याचे पोलीस अधीक्षक श्रीकांत धीवरे यांनी दिली आहे.