धुळे : रतनपुरा बोरकुंड (ता. धुळे) शिवारात व्यवसायानिमित्त आलेल्या साताऱ्याच्या तरुणाचा हत्याराच्या सहाय्याने निर्घृण खून (Crime News) झाल्याची खळबळजनक घटना रविवारी समोर आली. याप्रकरणी रात्री उशिरापर्यंत (Dhule News) धुळे तालुका पोलिसात गुन्हा दाखल करण्यात आला. (Letest Marathi News)

शेरेशिंदेवाडी (जि. सातारा) येथील आदर्श दत्तात्रय पिसाळ (वय २३) असे मृत तरुणाचे नाव आहे. त्याच्यासह त्याच्या गावातील आणखी एक जण शेती सपाटीकरण करण्याच्या व्यवसायानिमित्त रतनपुरा येथे आले होते. रविवारी सकाळी गाव शिवारातील शेतात उभ्या ट्रॅक्टरजवळ आदर्श पिसाळ हा मृतावस्थेत आढळून आला. शनिवारी (ता.११) सायंकाळी शेतातून येणाऱ्या-जाणाऱ्यांनी तो झोपलेला असावा असे समजून लक्ष दिले नाही.

शंका आल्‍याने झाला उलगडा

मात्र, सकाळी शंका आल्याने जवळ जाऊन पाहिले त्यावेळी आदर्श याच्या चेहऱ्यावर गंभीररीत्या मारून त्याचा कोणीतरी खून केल्याचे दिसून आले. त्यानंतर गावात खळबळ उडाली. माहिती मिळताच सहाय्यक पोलिस अधीक्षक एस. ऋषिकेश रेड्डी, धुळे तालुका पोलिस ठाण्याचे पोलिस निरीक्षक दत्तात्रय शिंदे, पोलिस उपनिरीक्षक सागर काळे यांनी घटनास्थळी पाहणी केली. पंचनामा करून मृतदेह जिल्हा रुग्णालयात नेण्यात आला. दरम्यान, तरुणाच्या खुनाचे कारण गुलदस्त्यात असून पोलिस तपास करत आहेत.