Dhule News: आमदार फारुख शहा– ठाकरे गट शिवसैनिकांमध्ये जुंपली; विकास कामांच्या श्रेयवादाची लढाई

धुळे : विकास कामावरून सध्या ठाकरे गट शिवसैनिक व आमदार फारुक शहा यांच्यात श्रेय वादाची लढाई सुरू असल्याचे बघावयास मिळत आहे. खानदेश वासियांचे कुलदैवत असलेल्या धुळे (Dhule News) शहरातील आई एकवीरा देवी मंदिराच्या कामावरून श्रेयवाद सुरू आहे. (Breaking Marathi News)

माजी पर्यटन मंत्री आदित्य ठाकरे यांनी आई एकविरा देवी मंदिराच्या विकास कामासाठी निधी मंजूर केला असल्याचे म्हणत ठाकरे गटाच्या शिवसैनिकांनी रविवारी धुळे येथील आई एकविरा देवी मंदिराच्या परिसरात विकास कामाचे उद्घाटन केले होते. परंतु त्याच ठिकाणी आज आमदार फारुक शहा यांनी विकास कामाच्या फलकाचे अनावरण करून हा विकास निधी आपण आणला असल्याचे स्पष्ट केले आहे.

स्‍थगिती उठविल्‍याचा दावा

गेल्या सरकारच्या विकास कामांना सद्यस्थितीत असलेल्या शिंदे व फडणवीस सरकारने स्थगिती दिल्यानंतर आई एकवीरा देवी मंदिराच्या विकास कामाला देखील स्थगिती मिळाली होती. आपण पर्यटनमंत्र्यांकडे पाठपुरावा करून ही स्थगिती उठवत तीन कोटी रुपयांचा निधी मंदिराच्या विकास कामासाठी आणला असल्याचे आमदार फारुक शहा यांनी यावेळी उद्घाटन प्रसंगी बोलताना स्पष्ट केले आहे. यामुळे आता या विकास कामाच्या श्रेयवादाच्या लढाईत पुढे आणखी वाद वाढण्याची देखील चिन्ह या निमित्ताने दिसून येत आहेत.