• ३ मुलांना घेऊन आईने नळदुर्ग किल्ल्यावरून उडी मारली

• या घटनेत आई आणि मुलाचा मृत्यू तर दोन मुली जखमी

• दोन मुलींची प्रकृती गंभीर असून रुग्णालयात उपचार सुरू

• या घटनेचा तपास नळदुर्ग पोलिस करत आहेत

बालाजी सुरवसे, धाराशिव

धाराशिव जिल्ह्यातून एक धक्कादायक बातमी समोर आली आहे. एका महिलेने आपल्या ३ मुलांसह नळदुर्ग किल्ल्यावरून उडी मारली. या घटनेत दोघांचा दुर्दैवी मृत्यू झाला तर दोघे जण गंभीर जखमी झाले आहेत. आई आणि मुलाचा मृत्यू झाला. तर जखमी झालेल्या मुलींना उपचारासाठी रुग्णालयात दाखल करण्यात आले आहे. या घटनेमुळे धाराशिव हादरले. नळदुर्ग पोलिस सध्या या घटनेचा तपास करत आहेत.

मिळालेल्या माहितीनुसार, धाराशिव जिल्ह्यातील घटनेने संपूर्ण महाराष्ट्राला हादरवून टाकले. दोन मुली आणि एक मुलासह आईने नळदुर्ग किल्ल्यावरून उडी घेतली. यात महिलेचा आणि मुलाचा जागीच मृत्यू झाला आहे. तर दोन मुली गंभीर जखमी झाल्या असून त्यांना पुढील उपचारासाठी धाराशिव येथील शासकीय रुग्णालयात पाठवल्याची माहिती आहे. घटनेची माहिती मिळताच पोलिसांनी घटनास्थळी धाव घेतली.

आई आणि मुलगा या दोघांचे मृतदेह पोलिसांनी ताब्यात घेत शवविच्छेदनासाठी रुग्णालयात पाठवले. महिलेने आत्महत्यासारखे टोकाचे पाऊल का उचलले याचा तपास पोलिस करत आहेत. संबंधित आत्महत्या करणारी महिला ही उमरगा तालुक्यातील वंताळा गावची असल्याची प्राथमिक माहिती देखील समोर आली आहे. दरम्यान घटनेचे कारण अद्याप अस्पष्ट असले तरी या घटनेने धाराशिव जिल्ह्यात खळबळ उडाली आहे. पोलिसांनी महिलेच्या कुटुंबीयांना घटनेची माहिती दिली आहे. कुटुंबीयांचा जबाब नोंदवला जात आहे.