धाराशिव : जिल्ह्यातील भूम तालुक्यात एसटी महामंडळाच्या अधिकाऱ्यांकडून प्रवाशांच्या सुरक्षेचा गंभीर बेजबाबदारपणा होत असल्याचे धक्कादायक चित्र समोर येत आहे. गाड्यांची दुरवस्था असतानाही लांब पल्ल्याच्या मार्गांवर धाडल्या जात असल्याचे निर्दशनास येत आहे. गाड्यांची दुरवस्था झालेल्या एसटी वाहनाच्या अपघाताच्याही घटना घडल्या आहेत. त्यामुळे विभागाकडून प्रवाशांच्या जीवाशी खेळ होत असल्याचे उघड होत आहे.

विशेषतः भूम ते बोरिवली या लांब अंतराच्या मार्गावर, अत्यंत जर्जर, तांत्रिक दोषांनी भरलेल्या एसटी बस नियमितपणे सोडल्या जात आहेत. ब्रेक फेल होणे, लाईट न लागणे, यांसारख्या मूलभूत यंत्रणाही या एसटी गाड्यांचे नीट कार्यरत नाहीत. त्यामुळे गाड्यांची वाईट अवस्था समोर येत आहे.

स्थानिक सूत्रांनी दिलेल्या माहितीनुसार, भूम आगारातील काही चालकांनीही ही बाब वरिष्ठ अधिकाऱ्यांच्या निदर्शनास वारंवार आणून दिली. मात्र यावर कोणतीही ठोस कार्यवाही होत नसल्याची तक्रार आहे. परंतु नवीन आलेल्या गाड्या स्थानिक भागासाठी वापरण्यात येत आहेत.

या प्रकरणी संपर्क साधला असता, एसटी महामंडळाचे प्रमुख अधिकारी उल्हास शिंगारे यांनी सांगितले की, गाडीचा खर्च जास्त आहे. त्यातून उत्पादन येत नाही. त्यामुळे आम्ही अशाच प्रकारच्या गाड्या देणार. तुम्हाला काय करायचे ते करा. आम्ही आमची मनमानी करू. अशा पद्धतीने उत्तर देण्यात आले'.

प्रवाशांच्या मते, हे कारण पुरेसे समाधानकारक नाही. सार्वजनिक वाहतूक ही लाखो नागरिकांच्या दैनंदिन जीवनाचा अविभाज्य भाग आहे. अशा स्थितीत, वाईट अवस्था झालेल्या बसने प्रवास करणे म्हणजे अपघाताला आमंत्रण देण्यासारखे आहे. स्थानीय प्रशासन, एसटी महामंडळाचे वरिष्ठ अधिकारी आणि परिवहन मंत्रालय यांनी या समस्येकडे तातडीने लक्ष देऊन सुरक्षित, नीटनेटकी वाहतूक व्यवस्था उपलब्ध करून देणार का, असा सवाल उपस्थित करण्यात येत आहे.