सरपंच संतोष देशमुखांच्या क्रूर हत्या प्रकरणात वाल्मिक कराडच मास्टरमाईंड असल्याचं समोर आलं. आणि धनंजय मुंडेंची मंत्रिमंडळातून विकेट पडली... मात्र आता खुद्द उपमुख्यमंत्री अजित पवारांनीच धनंजय मुंडेंच्या मंत्रिमंडळातील कमबॅकचे संकेत दिलेत...

कृषीमंत्री माणिकराव कोकाटेंचा सभागृहात रमी खेळतानाचा व्हिडीओ समोर आल्यानंतर त्यांच्या मंत्रिपदावर टांगती तलवार आहे... तर दुसरीकडे उच्च न्यायालयाने कृषी घोटाळा प्रकरणी धनंजय मुंडेंना क्लीन चिट दिलीय.. त्यामुळे कोकाटेंचं मंत्रिपद मुंडेंना दिलं जाण्याची चर्चा आहे... मात्र देशमुख हत्या प्रकरण प्रलंबित असताना मुंडेंना मंत्रिमंडळात घेण्याची घाई का? असा सवाल राऊतांनी उपस्थित केलाय...

तर कृषी घोटाळ्यासंदर्भात उच्च न्यायालयाच्या निर्णयाला सर्वोच्च न्यायालयात आव्हान देणार असल्याचं अंजली दमानियांनी जाहीर केलंय...

धनंजय मुंडेंना कृषी घोटाळा प्रकरणी क्लिन चीट मिळाली असली तरी संतोष देशमुख हत्या प्रकरण कोर्टात प्रलंबित आहे... त्यामुळे संतोष देशमुख हत्या प्रकरणाचा निर्णय येण्याआधीच अजित पवार धनंजय मुंडेंना मंत्रिपद देणार का? आणि माणिकराव कोकाटेंचं कृषीमंत्रिपद धनंजय मुंडेंना दिलं जाणार का? याकडे राज्यातील जनतेचं लक्ष लागलंय...