धनंजय देशमुखांचा साडू दादासाहेब खिंडकर याच्यासह ७ जणांवर पिंपळनेर पोलीस ठाण्यात गुन्हा दाखल करण्यात आलाय. ओंकार सातपुते या तरूणाला मारहाणप्रकरणी दादासाहेब आणि त्याच्या साथीदारांवर गुन्हा दाखल करण्यात आलाय. १२ मार्चला समाज माध्यमांमध्ये एक व्हिडिओ व्हायरल झाला होता. या व्हिडिओत दादासाहेब खिंडकर काठीनं मारहाण करत होते. या प्रकरणी पोलिसांनी कारवाई करत आरोपींविरोधात गुन्हा दाखल केलाय.

बीडच्या बाभुळगावचे सरपंच दादासाहेब खिंडकर यांनी गावातीलच ओमकार सातपुते या तरुणाला अमानुष मारहाण केली होती. ही मारहाण गतवर्षी झाल्याचे समोर आलंय. या अमानुष मारहाणीचा व्हिडिओ सोशल माध्यमांवरती प्रचंड व्हायरल झाला होता. यात तरूणाला मारहाण करत असलेली व्यक्ती धनंजय देशमुख यांचा साडू दादासाहेब खिंडकर आहे.

या मारहाण प्रकरणी बीडच्या पिंपळनेर पोलीस ठाण्यात गुन्हा दाखल करण्यात आला आहे. माजी सरपंच दादासाहेब खिंडकर यांच्यासह इतर ७ लोकांवर गुन्हा दाखल करण्यात आला आहे. यासह अपहरण केल्याप्रकरणी गुन्हा दाखल करण्यात आला आहे. याची माहिती पिंपळनेर पोलीस ठाण्याचे पोलीस निरीक्षक घुगे यांनी दिली आहे. आरोपींच्या शोधासाठी एक पथक तयार करण्यात आलं आहे.

नेमकं प्रकरण काय?

मस्साजोगचे सरपंच संतोष देशमुख हत्याप्रकरणाची आग अजूनही लोकांमध्ये धगधगत आहे. दरम्यान, धनंजय देशमुख यांच्या साडूचा १२ मार्चला एक व्हिडिओ समोर आला होता. त्यानंतर बीडमध्ये चर्चेला उधाण आलं आहे. कौटुंबिक वादातून दादासाहेब खिंडकर याने तरूणाचे आधी अपहरण केलं होतं. नंतर शेतात नेत त्याला बेदम मारहाण केली होती. या मारहाणीचा व्हिडिओ व्हायरल झाल्यानंतर पोलीस ठाण्यात आरोपीविरोधात गुन्हा दाखल करण्यात आलाय.