चिकन खाणाऱ्यांसाठी एक महत्त्वाची बातमी समोर येत आहे. पुन्हा एकदा बर्ड फ्लूने आपल्या राज्यामध्ये शिरकाव केला आहे. बर्ड फ्लूच्या काळात कोंबडीचं मांस खाल्ल्याने मानवांमध्येही बर्ड फ्लूचा संसर्ग होण्याचा धोका असतो. लातूर जिल्ह्यातील अहमदपूर तालुक्यातील ढाळेगाव येथील पोल्ट्री फार्ममध्ये ४२०० बॉयलर कोंबड्यांच्या पिल्यांचा अचानक मृत्यू झाल्याची धक्कादायक घटना घडली आहे. या कोंबड्यांच्या पिल्यांचे सॅम्पल तपासणीसाठी पुणे येथील प्रयोगशाळेत पाठवण्यात आले आहेत.

यापूर्वी, उदगीर येथे बर्ड फ्ल्यूमुळे १०० ते १५० कावळ्यांचा मृत्यू झाल्याची घटना समोर आली होती, आणि आता अहमदपूर तालुक्यातील ढाळेगावात कोंबड्यांच्या पिल्यांचा मृत्यू झाल्याने स्थानिकांमध्ये व पशुपालकांमध्ये चिंता वाढली आहे. अहमदपूर तालुक्यातील ढाळेगावमध्ये पोल्ट्री फार्मवरील ४२०० कोंबड्यांच्या पिल्यांचा अचानक मृत्यू झाल्याने चिंतेचे वातावरण निर्माण झाले आहे. या घटनेची दखल घेत पशुवैद्यकीय अधिकारी घटनास्थळी पोहोचले आणि पाहणी केली.

कोंबड्यांच्या पिल्यांच्या मृत्यूचे कारण काय आहे, याचा तपास सुरू आहे. सॅम्पल्स पुणे येथील प्रयोगशाळेत पाठवण्यात आले आहेत आणि त्यांचे परिणाम आल्यानंतरच मृत्यूचे कारण स्पष्ट होऊ शकते, असे अधिकाऱ्यांचे म्हणणे आहे. ढाळेगावमधील ही घटना, बर्ड फ्ल्यूच्या संकटाची पुनरावृत्ती होऊ शकते, ज्यामुळे पशुधन आणि कुक्कुट व्यवसायावर गंभीर परिणाम होऊ शकतात. यामुळे, पशुपालक आणि स्थानिक प्रशासनाला अधिक सावध राहण्याची आवश्यकता आहे.

बर्ड फ्ल्यूच्या प्रसाराच्या चिंतेमुळे प्रशासनाने सखोल तपास सुरू केला आहे आणि येणाऱ्या दिवसात यासंदर्भातील अधिक माहिती समोर येईल. या परिस्थितीला योग्य प्रकारे हाताळण्यासाठी प्रशासन आणि पशुवैद्यकीय अधिकारी सतर्क झाले आहेत, आणि या घटनेतून पुढे जाऊन बर्ड फ्ल्यू किंवा अन्य रोगांचा प्रसार होईल का, याबद्दल अधिक तपासणी केली जात आहे.