सचिन बनसोडे,साम टीव्ही

संगमनेर |अहिल्यानगर: संगमनेर तालुक्यातील गुंजाळवाडी परिसरात बनावट नोटा छापणाऱ्या एका घरावर पुणे गुप्तचर विभागाने धाड टाकून कारवाई केली आहे. दिल्ली गुप्तचर विभागाच्या आदेशानुसार ही धाड टाकण्यात आली. कारवाईदरम्यान, नोटा बनवण्यासाठी वापरण्यात येणारे प्रिंटर, विशेष प्रकारचा कागद आणि इतर साहित्य पोलिसांच्या हाती लागले आहे.

असा आला बनावट नोटांचा छापखाना उघडकीस,

गुंजाळवाडी परिसरात एका घरात मोठ्या प्रमाणावर बनावट नोटा छापल्या जात असल्याची माहिती दिल्ली गुप्तचर विभागाला मिळाली होती. त्यानंतर, पुणे गुप्तचर विभागाने संगमनेर पोलिसांसह संयुक्त कारवाई करत संबंधित घरावर छापा टाकला. या छाप्यात प्रिंटर, बनावट नोटांसाठी वापरण्यात येणारा कागद आणि इतर साहित्य जप्त करण्यात आले आहे.

बनावट नोटा छापणारा रजनीकांत रहाणे याची कसून चौकशी सुरू आहे. या नोटा कुठे चलनात आणल्या जात होत्या आणि छपाईसाठी लागणारा कागद कुठून आणला जात होता, याचा तपास पोलीस करत आहेत. ग्रामीण भागात अशा प्रकारचा बनावट नोटांचा कारखाना उघडकीस आल्याने परिसरात मोठी खळबळ उडाली आहे.

पोलीस उपाधीक्षक कुणाल सोनवणे यांनी दिलेल्या माहितीनुसार,

या कारवाईत मोठ्या प्रमाणावर बनावट नोटा तयार करण्याचे साहित्य जप्त करण्यात आले आहे. संशयिताची चौकशी सुरू असून, या रॅकेटमधील इतर आरोपींचा शोध घेतला जात आहे.ही घटना समोर आल्यानंतर पोलिसांनी परिसरातील सुरक्षाव्यवस्था अधिक कडक केली आहे. तसेच, बनावट नोटा प्रकरणात आणखी कोणी सहभागी आहे का, याचा तपास सुरू आहे.