धुळे : साक्री तालुक्यातील मालनगाव या धरणामध्ये असलेले पाणी साक्रीकरांना देण्यास स्थानिकांनी विरोध दर्शविला आहे. साक्री तालुक्यातील मालगाव मध्यम प्रकल्प हा या परिसरातील महत्वाचा मानला जाणारा प्रकल्प आहे.याच प्रकल्पातील पाणी साक्री शहराला देण्यास मालनगाव धरण बचाव संघर्ष समितीच्या वतीने आज मालगाव प्रकल्पावर जाऊन प्रशासनाच्या निर्णया विरोधामध्ये आंदोलन करण्यात आले आहे.

हे देखील पहा -

साक्रीकरांना अक्कलपाडा प्रकल्प हा जवळ असून मालनगाव प्रकल्प हा साक्री पासून बऱ्याच अंतरावर आहे आणि त्यामुळे अक्कलपाडा धरणातूनच साक्रीकरांना पिण्याच्या पाण्याचा पुरवठा करण्यात यावा अशी मागणी यावेळी आंदोलनकर्त्यांनी केली आहे.

यावेळी पाण्यात उतरून आंदोलकांनी प्रशासनाचा निषेध करीत प्रशासनाच्या विरोधामध्ये घोषणाबाजी देखील केली आहे. यावेळी तहसील अधिकाऱ्यांनी आंदोलनाच्या ठिकाणी पोहचून आंदोलकांचे म्हणणे ऐकून घेतले. त्याचबरोबर यासंदर्भात आंदोलकांच्या तीव्र भावना लक्षात घेता पुढील काही दिवसांमध्ये योग्य तो निर्णय प्रशासनातर्फे घेण्यात येणार असल्याचे आश्वासन देखील आंदोलकांना देण्यात आले. यावेळी आंदोलकांनी आपल्या मागण्यांचे निवेदन तहसीलदार यांना दिले आहे.

Edited By : Krushnarav Sathe