Solapur News :

आगामी लोकसभा निवडणुकीबाबत महाविकास आघाडीच्या फॉर्म्युल्यावर अद्याप एकमत होताना दिसत नाही. वंचित बहुजन आघाडीला महाविकास आघाडीत समाविष्ट करुन घेण्यासाठी प्रयत्न सुरु आहेत.

मात्र प्रकाश आंबेडकर यांनी सम-समान फॉर्म्युल्याची ऑफर दिल्याने महाविकास आघाडीत मतभेद होताना दिसत आहे. प्रकाश आंबेडकर यांच्या भूमिकेवर बोलताना काँग्रेसचे ज्येष्ठ नेते सुशीलकुमार शिंदे यांनी म्हटलं की, प्रकाश आंबेडकर यांचं सगळं ऐकलं जाईलच असं नाही.

भाजपविरोधातील लढाईत सर्वांना बरोबर घेऊन गेले पाहिजे. प्रकाश आंबेडकर यांच्या वंचित बहुजन आघाडीला महाविकास आघाडीत घेण्याबाबत वरिष्ठ पातळीवर काय चर्चा सुरू आहे, याची मला माहिती नाही.

पण भाजपविरोधातील लढाईत सर्वांना बरोबर घेऊन गेले पाहिजे, या मताचा मी आहे. प्रकाश आंबेडकर समसमान जागा मागत आहेत. मात्र त्यांचे सगळेच ऐकले जाईल, असे नाही, असं सुशीलकुमार शिंदे यांनी म्हटलं. ('साम टीव्ही'चं व्हॉट्सअ‍ॅप चॅनल जॉईन करण्यासाठी येथे क्लिक करा)

महाविकास आघाडीने आधी जागा वाटपाचा फॉर्म्युला ठरवताना वंचितला दोन जागा सोडण्यात येतील, अशी माहिती समोर येत होती. मात्र प्रकाश आंबेडकर यांनी थेट समान जागावाटपाचा फॉर्म्युला माध्यमांसमोर मांडला होता.

मात्र याबाबत कुठलीही चर्चा झाली नसल्याचंही प्रकाश आंबेडकर यांनी सांगितलं होतं. त्यामुळे नेमका महाविकास आघाडीचा जागा वाटपचा फॉर्म्युला काय असेल आणि प्रकाश आंबेडकरांना तो मान्य होईल का? या प्रश्नाची उत्तरे येत्या काळात मिळतील.