भंडारा : राज्यात महाविकास आघाडी सरकार (mva government) सत्तेत आल्यापासून विरोधकांनी अनेक मुद्द्यांवरुन सरकारवर टीका केली. तीन चाकांची महाविकास आघाडीची गाडी लवकरच राजकीय पटलावर कोसळेल, असं भाकीतही विरोधी पक्षनेते (Devendra fadnavis) देवेंद्र फडणवीस यांनी केलं होतं. त्यानंतर राज्य सरकारने विरोधकांना टीकेला जशाच तसे उत्तर देण्यासाठी विकासकामांच्या संकल्पनेचा निर्धारही केला. असाच काहीसा संकल्प आता कॉंग्रेसचे प्रदेशाध्यक्ष नाना पटोले (Nana Patole) यांनी त्यांच्या वाढदिवसानिमित्त केला आहे. महाराष्ट्रात दोन ट्रिलियन डॉलरची अर्थव्यवस्था तयार करणार असून एक कोटी नागरिकांना रोजगार (Employment) देण्याचा संकल्पच नाना पटोले यांनी केला आहे.

वाढदिवसानिमित्त नाना पटोले माध्यमांशी बोलताना म्हणाले, आम्ही दोन दिवसांपूर्वी शिर्डी येथे नवसंकल्प अधिवेशन घेतले असून त्याच्या माध्यमातून घेतलेली भूमिका जनतेपर्यंत पोहोचवण्याचे काम करत आहोत. तसचे महाविकास आघाडी सरकारकडूनही याबाबत सकारात्मक भूमिका घेण्याचं ठरलं आहे.

केंद्र सरकारने शेतकऱ्यांना मारले असून आता आम्ही महाराष्ट्रात शेतकऱ्यांसाठी दोन ट्रिलियन डॉलरची अर्थव्यवस्था तयार करणार आहोत. त्या माध्यमातून एक कोटी तरुणांना रोजगार देणार आहोत. त्यामुळे भविष्यात शेतकऱ्यांना ताठ मानेनं जगता येणार आहे. त्याचबरोबर केंद्र सरकारने जाती-धर्मात निर्माण केलेला द्वेष थांबविण्याचा संकल्पही केला असल्याचे नाना पटोले म्हणाले.

Edited by - Naresh Shende