स्थानिक स्वराज्य संस्थांच्या निवडणुकांच्या तोंडावर राष्ट्रवादी काँग्रेस शरद पवार गटात फेरबदल होणार असल्याची चर्चा आहे. सूत्रांनी दिलेल्या माहितीनुसार, सध्या पक्षाचे प्रदेशाध्यक्ष असलेले जयंत पाटील यांनी पदाचा राजीनामा दिला असून, त्यांच्या जागी विधानपरिषदेचे आमदार शशिकांत शिंदे यांची नियुक्ती होण्याची शक्यता आहे. दरम्यान, शरद पवार गटात सुरू असलेल्या फेरबदलांबाबत मुख्यमंत्री देवेंद्र फडणवीस यांना प्रश्न विचारले असता, त्यांनी शुभेच्छा देत एका शब्दात उत्तर दिलंय.

मुख्यमंत्री देवेंद्र फडणवीस यांनी आज नवी मुंबई विमानतळाची पाहणी केली. कामांची पाहणी केल्यानंतर त्यांनी प्रसारमाध्यमांशी संवाद साधला. यावेळी पत्रकारांनी राष्ट्रवादी काँग्रेस शरद पवार गटात सुरू असलेल्या फेरबदलांबाबत प्रश्न विचारला. जयंत पाटील यांनी प्रदेशाध्यक्ष पदाचा राजीनामा दिल्याची चर्चा आहे, त्यांची जागा शशिकांत शिंदे यांना देणार असल्याची माहिती सुत्रांकडून मिळत आहे. यावर देवेंद्र फडणवीस यांना प्रतिक्रिया विचारण्यात आली.

यासंदर्भात बोलताना देवेंद्र फडणवीस म्हणाले, 'खरंतर त्यांचा हा अंतर्गत विषय आहे. ज्यांनी त्यांचा पदाचा राजीनामा दिला त्यांना शुभेच्छा, जे आगामी या पदाची धुरा सांभाळणार, त्यांनाही शुभेच्छा..सगळ्यांना चांगलं आणि छान काम करावं या शुभेच्छा', अशी प्रतिक्रिया देवेंद्र फडणवीस यांनी दिली.

यानंतर पत्रकारांनी मुख्यमंत्र्यांना, 'जयंत पाटील महायुतीत येणार आहेत का?' असा प्रश्न विचारला. यावर उत्तर देताना देवेंद्र फडणवीस यांनी 'नाही' असं उत्तर दिलं. त्यामुळे जयंत पाटील महायुतीत जाणार नाही, हे देवेंद्र फडणवीस यांच्या वक्तव्यावरून जवळपास स्पष्ट झालं आहे.