आज राज्याचे मुख्यमंत्री देवेंद्र फडणवीस साताऱ्यातील फलटण दौऱ्यावर आहेत. त्यांच्या हस्ते विकासकामांचं भूमिपूजन करण्यात आलं. यावेळी त्यांनी विविध विषयांवर भाष्य केलं. मुख्य म्हणजे उपजिल्हा रूग्णालयातील डॉक्टर तरूणी आत्महत्याप्रकरणाबाबतही त्यांनी भाष्य केलं. 'भगिनीला न्याय दिल्याशिवाय राहणार नाही', असं फडणवीस म्हणाले. यावेळी त्यांनी योजनेबाबतही माहिती दिली. लाडकी बहीण योजना अविरत सुरू राहणार, असं मुख्यमंत्री म्हणाले.

मुख्यमंत्री लाडकी बहीण योजनेमुळे महायुतीला विधानसभा निवडणुकीत घवघवीत यश मिळालं. या योजनेचा फायदा सामान्य महिला वर्गाला झाला. दरम्यान, महायुतीचं सरकार आल्यानंतर या योजनेत काही निकष लावण्यात आले. या निकषांमुळे लाखोंच्या संख्येनं महिला अपात्र ठरल्या. त्यामुळे मुख्यमंत्री लाडकी बहीण योजना लवकरच बंद होणार, असं विरोधकांकडून वारंवार सांगण्यात येत आहे.

मात्र, लाडकी बहीण योजना अविरत सुरू राहणार, असं मुख्यमंत्री देवेंद्र फडणवीस म्हणाले. 'आम्ही सुरू केलेल्या योजना कधीच बंद होणार नाही. सातत्यानं काही लोक सांगतात लाडकी बहीण योजना बंद होणार. पण जोपर्यंत महायुती आहे, तोपर्यंत लाडकी बहीण योजना बंद होणार नाही', असं मुख्यमंत्र्यांनी सभेत ठणकावून सांगितलं.

'लाडकी बहीण महिलांसाठी आहे. लाडक्या बहिणींना दिवाळीची भाऊबीज सातत्याने मिळत राहिल. हा विश्वास यावेळी मी देतो', असं देखील मुख्यमंत्री देवेंद्र फडणवीस म्हणाले. लाडकी बहीण योजनेव्यतिरिक्त मुख्यमंत्र्यांनी सभेत शेतकरी आणि विविध योजनांबाबतही भाष्य केलं.