Chhatrapati Sambhajinagar:

आज कृष्णजन्माष्टमी संपूर्ण देशात आनंदाने साजरी केली जात आहे. अशात सणाच्या दिवशीच पैठणमधून एक दु:खद घटना समोर आलीये. एका अडीच वर्षीय चिमुकल्याचा दुधाच्या कढईत पडून मृत्यू झाला आहे. सदर घटनेमुळे संपूर्ण शहरात हळहळ व्यक्त केली जातेय. (Latets Marathi News)

मिळालेल्या अधिक माहितीनुसार, छत्रपती संभाजीनगर जिल्ह्यातील पैठण शहरात ही हृदयद्रावक घटना घडली आहे. नेहरु चौक परिसरातील सजंरपुरा येथील अब्बु शमी कट्यारे यांच्या घरी मालेगाव येथील विवाहीत मुलगी माहेरी आली होती.

२८ ऑगस्ट रोजी मोहम्मद जियान मोहम्मद इरफान हा घरात खेळताना गरम दुधाच्या कढाईत पडल्याने मोठ्या प्रमाणावर भाजला होता. छत्रपती संभाजीनगर शासकीय रुग्णालयात उपचारा दरम्यान आज सकाळी पहाटे त्याचा मृत्यू झाला. पैठण पोलिस ठाणे येथे अकस्मात मृत्यूची नोंद करण्यात आली आहे.

या आधी देखील बुलढाण्यात अशीच एक घटना घडली होती. त्यावेळी या घटनेत ६ वर्षीय मुलगी दगावली. तिच्या वडिलांचा मिठाईचा व्यवसाय होता. त्यासाठी त्यांनी कढईत दुध तापवत ठेवलं होतं. त्यावेळी मुलगी खेळताना मोठ्या कढईत पडली. तिच्यावर देखील उपचार करण्यात आला मात्र मृत्यूशी सुरू असलेली तिची झूंज संपली आणि तिचा मृत्यू झाला.