छत्रपती संभाजीनगरमधून एक धक्कादायक बातमी समोर येत आहे. दांडिया खेळत असताना एका महिलेचा ह्रदयविकाराच्या झटक्यानं मृत्यू झाला आहे. दांडिया खेळत असताना त्यांना अस्वस्थ वाटू लागलं. त्या दांडिया खेळत असताना खाली कोसळल्या. त्यांना तातडीने रूग्णालयात दाखल करण्यात आले. मात्र, उपचारापूर्वीच त्यांचा मृत्यू झाला.

नंदिनी अंबादास पवार (वय वर्षे ३५) असे मृत महिलेचं नाव आहे. नंदिनी छत्रपती संभाजीनगर जिल्ह्यातील गंगापूर तालुक्यातील लासुर स्टेशन परिसरातील रहिवासी होती. लासूर स्टेशन येथे नवरात्र उत्सव मोठ्या उत्साहात साजरा केला जातो. मात्र, या उत्सवाला काल शुक्रवारी गालबोट लागलं.

दांडिया खेळत असताना एका महिलेला हृदयविकाराचा तीव्र झटका आला. यात महिलेचा जागीच मृत्यू झाला. घटनेच्या दिवशी नंदिनी अंबादास पवार नवरात्री उत्सवात दांडिया खेळत होत्या. त्यांना अचानक चक्कर आली आणि त्या जमिनीवर कोसळल्या. उपस्थित भावीकांनी त्यांना त्वरित खाजगी दवाखान्यात दाखल केलं.

मात्र, डॉक्टरांनी त्यांना तपासून मृत घोषित केलं. मिळालेल्या माहितीनुसार, नंदिनी या आरापूर येथील धनंजय ऑटो कंपनीमध्ये नोकरी करत होत्या. त्यांना दोन मुले असून, आज शनिवारी शवविच्छेदन अहवालानंतर पाडळसा येथे त्यांच्यावर अंत्यसंस्कार करण्यात येणार आहे.