Buldhana News :

भाजपच्या विधानासभा निवडणुकांतील विजयाचा देशभरात जल्लोष साजरा होत असताना बुलढाणा जिल्ह्यातील मेहकर येथे भाजपच्या दोन गटात राडा झाला हाेता. या राड्यात विधानसभा प्रमुखासह (bjp leader prakash gavai) तिघांना मारहाण करण्यात आली होती. या प्रकरणी भाजपाच्या २३ पदाधिकारी व कार्यकर्ते यांच्याविरुद्ध मेहकर पोलीसांनी गंभीर स्वरूपाच्या कलमान्वये गुन्हे दाखल केले आहेत. दूसरीकडे भाजप प्रदेशाध्यक्ष चंद्रशेखर बावनकुळे (chandrashekhar bawankule) यांनी या घटनेतील गुन्हे दाखल झालेल्यांना सहा वर्षासाठी पक्षातून निलंबीत केले आहे अशी माहिती भाजपातून देण्यात आली. (Maharashtra News)

या घटनेनंतर मेहकर विधानसभा प्रमुख प्रकाश गवई यांनी स्वतः पाेलीसांत तक्रार दिली आहे. त्यानूसार मेहकर पोलिसांनी २३ जणांवर (कलम १४७, १४८, १४९, ३२३, ३२४, ४२७, ५०४, ५०६ नुसार) गुन्हे दाखल केले आहेत.

फिर्यादी गवई, नवनियुक्त तालुकाध्यक्ष सारंग माळेकर, जिल्हा उपाध्यक्ष अर्जुन वानखडे हे भाजप संपर्क कार्यालयात पत्रकार परिषदेसाठी बसले होते. त्यावेळी काहींनी कार्यालयात घुसून त्यांना लोखंडी सळई, लाथा बुक्क्यांनी मारहाण करीत साहित्यांची मोडतोड केल्याचे तक्रारीत नमूद केले आहे. या घटनेचा व्हिडीओ सुद्धा व्हायरल झाला होता.

('साम टीव्ही'चं व्हॉट्सअ‍ॅप चॅनल जॉईन करण्यासाठी येथे क्लिक करा)

पाेलीसांनी दिलेल्या माहितीनूसार गुन्हे दाखल केलेल्या संशयितांमध्ये प्रल्हाद लष्कर, विलास लष्कर, प्रदीप इलग, चंद्रकांत अडेलकर, रोहित शेळके, शुभम खंदारकर, गोपाळ देशमुख, दीपक निकस, अक्षद दीक्षित, सीताराम ठोकळ, चेतन भांडेकर, महावीर मंजुळकर, गजू मंजुळकर, बलविर मंजुळकर,आकाश पिटकर, सुमित शिंदे, ओम पिटकर, जयकांत शिक्रे, रवी शिंदे, आकाश मोहिते, सोनू गुंजकर, शंकर गायकवाड यांचा समावेश आहे.

दरम्यान या घटनेतील गुन्हे दाखल झालेल्यांना भाजप प्रदेशाध्यक्ष चंद्रशेखर बावनकुळे यांनी सहा वर्षासाठी पक्षातून निलंबीत केले आहे अशी माहिती भाजपातून देण्यात आली.

Edited By : Siddharth Latkar