सांगली जिल्हा मध्यवर्ती बँकेचे संचालक मंडळ बरखास्त करून प्रशासक नेमावा या मागणीसाठी येत्या 25 जूनला जिल्हा बँकेवर चाबूक मोर्चा काढण्यात येणार असल्याची माहिती माजी मंत्री सदाभाऊ खोत आणि भाजप आमदार गोपीचंद पडळकर यांनी दिली. तसेच बँकेतील घोटाळे बहादरांचा म्हाेरक्या जयंत पाटील हे असल्याचा गंभीर आरोप पडळकर यांनी केला.

या बॅंकेतील आजी- माजी संचालकांकडून कोट्यावधी रुपयांचा घोटाळा करण्यात आला आहे. बेकायदेशीर रित्या कर्जांचे वाटप देखील करण्यात आले आहे. अस्तित्वात नसलेल्या संस्थांच्या माध्यमातून बोगस कर्ज देखील घेण्यात आल्याचा आरोप पडळकर यांनी केला आहे.

सदाभाऊ खाेत म्हणाले सांगली जिल्हा बँकेची परिस्थिती ही चोर चोर मोसरे भाई अशा पद्धतीची झाली आहे. या बँकेमध्ये दलाल आणि ठेकेदार घुसलेले आहेत. आमदार-खासदार मंत्री झाल्यावर संचालक पद कशासाठी हवे असा संतप्त सवाल करत जिल्हा बँक ही टग्याची बँक झाली आहे अशी टीका करत बॅंकेच्या कारभाराचा सदाभाऊंनी निषेध केला.

Edited By : Siddharth Latkar