संजय जाधव 

बुलढाणा : मागील महिन्यात नांदुरा तालुक्यातील काही गावांमध्ये ढगफुटी सदृश्य पाऊस झाला. या पावसामुळे आलेल्या महापुरात (Buldhana) नदीकाठावरील नागरिकांच्या घराचे तसेच शेती पिकांचे मोठ्या प्रमाणात नुकसान झाले आहे. या पावसात झालेल्या नुकसानाची भरपाई मिळावी यासाठी (MNS) मनसेच्या वतीने अनोखे आंदोलन करण्यात येत असून झाडावर बसून आमरण उपोषण केले जात आहे. (Maharashtra News)

अतिवृष्टीमुळे नांदुरा तालुक्यातील माळेगाव गोंड, खडदगाव, लोणवाडी, पिंपळखुटा धांडे येथील नागरिकांचे मोठ्या प्रमाणात आर्थिक नुकसान झाले आहे. नांदुरा तालुक्यात झालेल्या (Heavy Rain) पावसातील नुकसानीबाबत प्रशासनाला नुकसान भरपाईसाठी वारंवार निवेदने देऊन अद्यापही सानुग्रह मदतीचे वाटप करण्यात आलेले नाही. त्यामुळे संतप्त झालेल्या शेतकरी तसेच ग्रामस्थांच्या वतीने महाराष्ट्र नवनिर्माण सेना नांदुरा तालुका उपाध्यक्ष राजेश काळे यांच्या नेतृत्वात बदामच्या झाडावर बसून आमरण उपोषणाला सुरुवात करण्यात आली आहे. 

मदत मिळेपर्यंत आंदोलन 

तहसीलदारानी दिलेल्या माहितीनुसार तालुक्यातील १२५ घरांची पडझड असून ७६ जनावरे पुराच्या पाण्यात वाहुन गेली आहेत. तर ११ जनावरांचा यामध्ये मृत्यू झाल्याचे सांगण्यात आले आहे. या सर्व नुकसानीचे पंचनामे झाले असून अद्यापही सानुग्रह मदतीचे वाटप करण्यात आलेले नाही. त्यामुळे मनसेच्यावतीने हा आक्रमक आंदोलनाचा पवित्रा घेण्यात आला आहे. तर जोपर्यंत शेतकऱ्यांना मदत मिळत नाही; तोपर्यंत झाडावर बसून उपोषण चालूच राहणार असल्याचे मनसेच्या वतीने सांगण्यात आले आहे.