बुलढाणा : बुलढाणा जिल्ह्यातील शेगाव तालुक्यातील शेगावपासून (Shegaon) अवघ्या पाच किलोमीटर अंतरावर असलेल्या एकफळ गावातील नागरिकांना अवकाळी पावसाने जीवघेणा संघर्ष करावा लागत आहे. गेल्या (Buldhana News) चार दिवसांपासून सातत्याने या परिसरात कोसळत असलेल्या अवकाळी पावसामुळे भर उन्हाळ्यात या गावातील नागरिकांना चिखल तुडवत व रेल्वे रुळावरून जीवघेणा प्रवास करावा लागत आहे. (Tajya Batmya)

शेगाव लगत असलेल्‍या एकफळ गावाला रस्ताच नसल्यामुळे व गेल्या चार दिवसांपासून कोसळत असलेल्या पावसामुळे या गावात दुचाकीही जाण्यास मार्ग नाही. त्यामुळे गावातील आजारी रुग्णांना शाळकरी मुलांना व वयोवृद्ध नागरिकांना जीवघेणा संघर्ष करत रेल्वे गुळावरून पाच किलोमीटर अंतर पार करावे लागत आहे. भर उन्हाळ्यात या नागरिकांना अवकाळी पावसामुळे या यातना सहन कराव्‍या लागत आहेत. तर पावसाळ्यात या नागरिकांच्या हाल न विचारलेलेच बरे..!

रस्‍ता नसल्‍याने लग्‍नही होईना

गावाला रस्ताच नसल्यामुळे या गावातील ३० ते ३५ तरुणांचे लग्न जुळत नसल्याचाही गावकरी सांगत आहेत. गावाला रस्ता नसल्यामुळे या गावात या तरुणांना कुणी मुलगीही देत नाही हे भीषण वास्तव स्वातंत्र्याच्या 75 वर्षानंतर अवकाळी पावसाने निमित्ताने समोर आले आहे.