बुलडाणा : तुमच्या घरात जर लहान मुलं असतील तर त्यांच्याकडे नीट लक्ष द्या. चुकूनही त्यांच्याकडे दुर्लक्ष करू नका. कारण, बुलडाणा (Buldhana) जिल्ह्यात एक अशी घटना घडली, जी वाचून तुमच्याही अंगावर काटा येईल. जिल्ह्यातील शेगाव येथे एका चिमुकल्याला अचानक खेळता-खेळता श्वसनाचा त्रास सुरू झाला. ही गोष्ट पालकांच्या लक्षात येताच त्यांनी तातडीने त्याला रुग्णालयात दाखल केलं. (Buldhana News Today)

डॉक्टरांनी या चिमुकल्याचा एक्सरे काढला. एक्सरे पाहून डॉक्टरांसह चिमुकल्याच्या पालकांच्याही पायाखालची जमीन सरकली. आशिर मोहम्मद आमिर असं साडेतीन वर्षीय चिमुकल्याचं नाव आहे. आशिरने नकळकत खेळता-खेळता १ रुपयांचं नाणं गिळलं होतं. डॉक्टरांच्या अथक प्रयत्नांमुळे त्याला वाचवण्यात यश मिळालं.

नेमकं काय घडलं?

शेगाव शहरात राहणाऱ्या मोहम्मद आमिर यांच्या साडेतीन वर्षीय चिमुकल्याला खेळताना अचानक श्वास घेण्यास त्रास होऊ लागला. त्यानंतर आमिर यांनी त्याला तातडीने रुग्णालयात दाखल केलं. तेथे डॉक्टरांनी एक्सरे काढला असता, आशिरने १ रुपयांचं नाणं गिळलं असल्याचं लक्षात आलं.

डॉक्टरांनी फोलिज कॅथेटरच्या मदतीने हे नाणं बाहेर काढून आशिरला जीवदान दिलं. आता आशिर हा सुखरूप असल्याचं डॉक्टरांनी सांगितले आहे. नाणे काढल्यानंतर बाळाला जीवदान मिळाल्याने त्याच्या आई-वडिलांनी सुटकेचा निश्वास सोडला.

पालकांसाठी विशेष सल्ला

लहान मुलांना कळत नसल्याने अनेकदा असे प्रकार घडतात. काही प्रकरणांत मुलांनी गिळलेल्या वस्तू आपोआप बाहेर येतील याची पालक वाट बघतात. त्यामुळे जीवावरही बेतू शकतं. त्यामुळे मुलं 6 वर्षाची होईपर्यंत पालकांनी विशेष काळजी घेणं गरजेचं आहे. याशिवाय, असं काही घडल्यास वेळ न घालवता रुग्णालयात वेळीच पोहोचणं महत्त्वाचं आहे.

Edited By - Satish Daud