बुलढाणा : गावातील दोन परिवारांमध्ये जुना वाद होता. हा वाद पुन्हा उफाळून आला. यातूनच पिता- पुत्रावर धारदार शस्त्राने जीवघेणा हल्ला करण्यात आला. यात पित्याचा जागीच मृत्यू झाला आहे. तर मुलगा गंभीर जखमी असून त्याच्या शासकीय रुग्णालयात उपचार सुरु आहेत. सदरची धक्कादायक घटना बुलढाण्याच्या खामगाव तालुक्यात घडली असून घटनेमुळे गावात तणावाचे वातावरण निर्माण झाले आहे. 

बुलढाणा जिल्ह्यातील खामगाव तालुक्यातील शेलोडी या गावात सदरची घटना घडली आहे. गावातील दोन कुटुंबांचा वाद होता. फार पूर्वीपासून असलेला वाद पुन्हा उफाळून आला होता. ४ मार्चला रात्री दोघांमध्ये पुन्हा वाद झाला. या वादातून समोरच्यानं पिता- पुत्रावर धारदार शस्त्राने हल्ला करण्यात आला. यात पित्याचा जागीच मृत्यू झाला. तर मुलगा गंभीर जखमी झाला आहे. घटनेनंतर गावात खळबळ उडाली आहे. 

जखमी मुलावर उपचार सुरु 

दरम्यान धारदार शस्त्राने हल्ला करण्यात आल्याने मुलगा गंभीर जखमी होऊन जमिनीवर कोसळला. यानंतर गावातील काही नागरिकांनी त्याला लागलीच रुग्णालयात उपचारासाठी दाखल केले. त्याच्यावर अकोला येथील शासकीय रुग्णालयात उपचार सुरू आहेत. यावेळी जखमींच्या नातेवाईकांनी रुग्णालयात गोंधळ घालत हल्लेखोरांवर कारवाईची मागणी केली आहे.  

नातेवाईक आक्रमक 

दरम्यान घटनेतील हल्लेखोर फरार झाले आहेत. मात्र जीवघेणा हल्ला करणाऱ्या सर्व आरोपींना अटक केल्याशिवाय मृतदेहावर अंत्यसंस्कार करणार नाही; अशी आक्रमक भूमिका नातेवाईकांनी व गावकऱ्यांनी घेत मृतदेह खामगाव ग्रामीण पोलीस स्थानकात आणला. यावेळी पोलीस आणि नातेवाईकांमध्ये बाचाबाची झाली. यामुळे तणावाचे वातावरण निर्माण झाले आहे.