बुलढाण्यातील लाचखोर सहायक वन संरक्षक अधिकारी (ACF) अश्विनी आपेट अखेर एसीबी जाळ्यात अडकली. अवैध मार्गाने तोडलेल्या झाडांची वाहतूक करण्यासाठी १५ हजारांची लाच घेताना सहायक वन संरक्षक अधिकारीला बेड्या ठोकण्यात आल्या आहेत. तर तिच्यासोबत लिपिक अमोल मोरे यालादेखील लाचलुचपत विभागाने अटक केली.

अश्विनी आपेट ही २०१६ बॅचची रेंज फॉरेस्ट ऑफिसर आहे. मागील वर्षीच तिला सहायक वन संरक्षक अधिकारी पदाची बढती मिळाली होती. परंतु अश्विनी आपेट हिच्याबद्दल पैशासंबंधी अनेक तक्रारी वरिष्ठ अधिकाऱ्यांकडे गेल्या होत्या. पण वरिष्ठांनी त्यावर कोणतीही कारवाई केली नव्हती.

आता अखेर लाचलुचपत प्रतिबंधक विभागाने कारवाई करत तिला लाच घेताना रंगेहात पकडलं. अश्विनी आपेट हिच्याबद्दल लाचलुचपत विभागाकडे अनेक तक्रारी करण्यात आल्या होत्या. त्यानंतर लाचलुचपत विभागाने सापळा रचत तिला जाळ्यात पकडलं.

लाचखोर अधिकारी म्हणून ओळख

वनविभागाच्या हद्दीतील तोडलेल्या झाडांची वाहतूक करण्यासाठी अश्विनी आपेट हिने ३० हजारांची लाच मागितली होती. त्यातील अॅडव्हान्स म्हणून १५ हजार रुपये स्वीकारतानाच ही कारवाई करण्यात आली. अश्विनी आपेट बुलढाणा वनविभागात सहायक वन संरक्षक अधिकारी म्हणून कार्यरत आहे. या विभागात ती लाचखोर अधिकारी म्हणून ओळखली जायची अशी माहिती सूत्रांनी दिली.

हाताखालच्या कर्मचारी, अधिकाऱ्यांना ती पैसे गोळा करण्यासाठी दबाव टाकायची अशी माहिती आहे. अश्विनी आपेट हिची सुरुवातीची पोस्टिंग बीड जिल्ह्यातील केज रेंजमध्ये झाली होती. त्यावेळीही तिने असे अनेक प्रकार केले होते अशी माहिती सुत्रांनी दिलीय.