संजय जाधव, बुलढाणा| ता. ९ जून २०२४

बुलढाणा जिल्ह्यातून एक दुर्दैवी घटना समोर आली आहे. बुलढाण्याच्या बोराळा येथील विद्यार्थ्यांचा भास्तन येथील पूर्णा नदीपात्रातील पाण्यात बुडून मृत्यू झाला. पाण्याचा अंदाज न आल्याने ही दुर्घटना घडली असून या घटनेने सर्वत्र हळहळ व्यक्त होत आहे.

याबाबत सविस्तर माहिती अशी की, जळगाव जामोद तालुक्यातील बोराळा येथील दोन जण आंघोळी करिता भेंडवळ पुढील भास्तन पुलानजीक असलेल्या पूर्णा नदीच्या पात्रात आंघोळीसाठी गेले होते. त्यामधील एका 17 वर्षीय विद्यार्थ्याचा पाण्यात बुडून मृत्यू झाल्याची घटना घडली.

बोराळा येथील शिवम सहदेव तायडे (वय 17 वर्ष) आणि त्याचा मित्र अभिजीत संतोष गायकी हे भास्तन येथील पूर्णा नदी पात्रात आंघोळीसाठी गेले होते. यावेळी पाण्याचा अंदाज न आल्याने शिवम चा पाण्यात बुडून मृत्यू झाला. या घटनेची माहिती त्याच्या मित्राने गावकऱ्यांना दिली. ज्यानंतर गावातील काही नागरिक घटनास्थळी दाखल होऊन शिवमला पाण्याबाहेर काढले आणि त्याला जळगाव ग्रामीण रुग्णालयात दाखल केले.

परंतु डॉक्टरांनी तपासणी करुन मृत्यू झाल्याची माहिती दिली. जळगाव पोलीस स्टेशन मध्ये या घटनेचा मर्ग दाखल केला असून पुढील तपास ठाणेदार आनंद महाजन यांच्या मार्गदर्शनाखाली सुरू आहे. शिवमच्या अचानक मृत्यूने तायडे परिवार तसेच गावामध्ये शोककळा पसरली आहे..