बुलढाण्यातील मेहकर तालुक्यातील विठ्ठलवाडी परिसरात भीषण अपघाताची घडली आहे. गर्भवती पत्नीला सासुरवाडीत भेटण्यासाठी निघालेल्या युवकाचा वाटेतच मृत्यू झाला. तरूण डोणगाव येथून अकोल्यातील नवेगावात गर्भवती पत्नीला भेटण्यासाठी गेला होता. तो दुचाकीवरून निघाला होता, अशी माहिती आहे. मात्र, वाटेतच दुचाकीला अज्ञात वाहनाची जोरदार धडक बसली. या अपघातात त्याचा दुर्देवी मृत्यू झाला. या प्रकरणी पोलिसांनी गुन्हा दाखल केला असून, आरोपीचा शोध सुरू आहे.

रूपेश दशरथ करवते (वय वर्ष ३०) असे मृत तरूणाचे नाव आहे. युवक मेहकर येथील डोणगावचा रहिवासी होता. तो एका संस्थेत व्हिडिओ एडिटर म्हणून कार्यरत होता. २१ सप्टेंबर रोजी तरूण रात्रीच्या सुमारास गर्भवती बायकोला भेटण्यासाठी अकोल्यातील नवेगावच्या दिशेनं निघाला होता. तो दुचाकीनं निघाला होता.

मात्र, विठ्ठलवाडीत रूपेशच्या दुचाकीला अज्ञात वाहनानं धडक दिली. पोलिसांनी दिलेल्या माहितीनुसार, अज्ञात वाहन अचानक दुचाकीसमोर आले. नंतर दुचाकीला जोरदार धडक बसली. यामुळे रूपेशचा दुचाकीवरून तोल गेला. तो रस्त्यावर कोसळला. गंभीर जखमी झाल्यानं रूपेशचा घटनास्थळीच मृत्यू झाला.

घटनेची माहिती मिळताच स्थानिकांनी पोलिसांना याची माहिती दिली. पोलिसांनी मृतदेह ताब्यात घेऊन शवविच्छेदनासाठी रूग्णालयात पाठवले आहे. तसेच घटनेचा पंचनामा केला आहे. आरोपी अज्ञात वाहनचालक सध्या फरार आहे. पोलिसांकडून आरोपीचा शोध सुरू आहे. या घटनेनंतर कुटुंबावर दुखा:चा डोंगर कोसळला आहे. परिसरातील नागरिकांनी हळहळ व्यक्त केली आहे.