भारत-बांगलादेश सीमेवर घुसखोरीविरोधी कारवाईदरम्यान गडचिरोली जिल्ह्याचे सुपुत्र आणि सीमा सुरक्षा दलाचे जवान सुरेश दुर्गा आंबडर यांना वीरमरण आले आहे. पश्चिम बंगालमधील सीमावर्ती भागात कर्तव्य बजावत असताना संशयित घुसखोरांशी झालेल्या चकमकीत त्यांनी देशासाठी आपले सर्वोच्च बलिदान दिले. ही दु:खद बातमी समजताच त्यांचे मूळ गाव मरारटोला (तालुका कुरखेडा) सह संपूर्ण गडचिरोली जिल्हयावर तीव्र शोककळा पसरली आहे.

मिळालेल्या माहितीनुसार, पश्चिम बंगाल येथील भारत बांगलादेश सीमेवर घुसखोरी रोखण्यासाठी बीएसतर्फे विशेष मोहीम राबवली जात होती. या मोहिमेत सहभागी असलेले जवान सुरेश आंबडर यांच्यावर संशयित घुसखोरांनी अचानक गोळीबार केला. या गोळीबारात ते गंभीर जखमी झाले. त्यांना तात्काळ उपचारासाठी रुग्णालयात दाखल करण्यात आले, मात्र उपचारादरम्यान त्यांची प्राणज्योत मालवली. वयाच्या अवघ्या 35 व्या वर्षी त्यांनी देशाचे रक्षण करताना वीरमरण पत्करले.

शहीद सुरेश आंबडर यांच्या पश्चात आई-वडील, भाऊ, पत्नी आणि एक लहान मुलगी असा परिवार आहे. एक तरुण आणि कर्तव्यदक्ष जवान गमावल्यामुळे आंबडर कुटुंबावर दुःखाचा डोंगर कोसळला असून, संपूर्ण गावात हळहळ व्यक्त केली जात आहे.

शहीद जवान सुरेश आंबडर यांचे पार्थिव लवकरच त्यांच्या मूळ गावी मरारटोला येथे आणण्यात येणार असून, त्यांच्यावर संपूर्ण शासकीय इतमामात अंत्यसंस्कार केले जातील.