नवनीत तापडिया, छत्रपती संभाजीनगर

Chhatrapati Sambhaji Nagar: बहीण-भावाच्या प्रेमाचे अतुट नातं असलेल्या रक्षाबंधन सण (Rakshabandhan Festival 2023) आज संपूर्ण देशभरामध्ये मोठ्या उत्साहात साजरा केला जात आहे. याच दरम्यान छत्रपती संभाजीनगरमध्ये (Chhatrapati Sambhaji Nagar) मन हेलावून टाकणारी घटना घडली आहे. रक्षाबंधननिमित्त बहिणीच्या घरी जाऊन भावाने आत्महत्या केली. उद्योगनगरी वाळूज परिसरात ही धक्कादायक घटना घडली आहे. या तरुणाने आत्महत्या का केली यामागचे कारण अद्याप अस्पष्ट आहे.

मिळालेल्या माहितीनुसार, उद्योग नगरी वाळूज परिसरातील बजाजनगरातील छत्रपती नगरमध्ये ही घटना घडली आहे. आकाश सर्जेराव शिंदे (३० वर्षे) असं आत्महत्या केलेल्या तरुणाचे नाव आहे. आकाश छत्रपती नगरमध्ये राहणाऱ्या आपल्या बहिणीच्या घरी रक्षाबंधनानिमित्त आला होता. याच ठिकाणी त्याने टोकाचे पाऊल उचलत जीवन संपवलं.

‘ताई मला माफ कर’ असे लिहून ठेवत या तरुणाने बहिणीच्या घरामध्ये गळफास लावून आत्महत्या केली आहे. आकाश शिंदे हा नांदेड जिल्ह्यातल्या खैरका या गावामध्ये आपल्या कुटुंबासोबत राहत होता. आकाशने हे टोकाचे पाऊल का उचलले यामागचे कारण अस्पष्ट आहे. पण त्याच्या जाण्यामुळे बहिणीला मोठा धक्का बसला आहे.

या घटनेची माहिती मिळताच वाळूज एमआयडीसी पोलिसांनी घटनास्थळी धाव घेतली. पोलिसांनी आकाशचा मृतदेह ताब्यात घेत शवविच्छेदनासाठी घाटी रुग्णालयामध्ये पाठवला आहे. रक्षाबंधनाच्या दिवशीच ही घटना घडल्यामुळे वाळूज परिसरामध्ये हळहळ व्यक्त केली जात आहे. याप्रकरणाचा तपास वाळूज एमआयडीसी पोलिसांकडून सुरु आहे.